Su boca a klem y no kier a laga bay
- Ta otro joggernan a bin dal e Pit bull cu piedra pa e laga bay
ORANJESTAD (AAN): Tabata Diasabra mainta trempan cu un patruya di Polis di Santa Cruz a wordo despacha door di Central di Polis pa e caminda di Kibaima pa Pos Abao, net poco pabao di MFA Paradera pa un caso serio. Ora cu Polis a yega, nan a papia cu un dama hoben kende tin herida na su bil parti abao cu ta sangrando.
A resulta cu e pida caminda aki cu su pista di core y cana, ta wordo uza hopi mainta trempan pa hendenan cu ta jog pa nan condicion y training. Diripiente un cacho Pit bull hunto cu 2 cacho mas, a cruza caya for di banda pazuid y bay ataca un dama hoben kende tabata coriendo e momento ey na pia.
E cacho Pit bull a yega y klem su boca na e bil di e dama, y pa nada di mundo no kier a laga bay. Cu inmenso dolor y bao di gritamento, esaki a hala atencion di par di jogger mas coriendo den e area, kendenan a core yega pa busca forma pa kita e cacho su boca. Pero e klem tabata fuerte, y e animal no tabata laga bay y mas bien ta sigui morde.
E area aki tin yen di piedra abao, y esaki e demas personanan a uza pa cu hopi forza tirando riba e animal, y ora cu e piedranan aki a cuminza ocasiona dolor, porfin e Pit bull a laga bay. Hunto cu e otro cachonan nan a core bay zuid rumbo pa mondi, y sigui pa un cas situa mas leu patras.
Esaki ta algo inaceptabel cu e isla tin Ley di Cacho, pero keto bay hendenan riba caya ta core riesgo di haya mordi fuerte. Anto den siman den oranan di mainta, y tambe merdia pa 1’or, por mira muchanan chikito cu ta cana e pida caminda aki ora cu scolnan na Paradera cuminza of caba.
Na Servicio di Emergencia na Hospital a atende e dama hoben cu a ricibi e mordi di e Pit bull. Si cualkier hende sa na kende e Pitbull cu e extra dos cachonan (diferente rasa) ta cana rond pabao di MFA Paradera, por yama Tipline di Polis na 111-41, y corda cu bo por keda anonimo. Polis awor tin atencion pa e caso.
