ORANJESTAD (AAN): Diadomingo merdia alrededor di 1:30 pm, yamadanan a drenta cu tin un accident serio riba caminda den Sero Biento, como 260 meter pabao di HomeBest Supermarket.
E prome unidad di Polis cu a yega, a bin topa cu e accident na e T-weg net banda di Sero Biento 11-D. For di prome bista a nota cu falta di duna preferencia a hunga un rol grandi.
Habitantenan a splica cu nan a tende un rastro largo di brake, sigui pa un impacto duro. A nota cu un vehiculo Flatbed Truck Kia K2700 color blanco a sali for di e caminda chikito, sin duna preferencia na un auto sedan Nissan Skyline color blanco cu tabata bin di pabao.
Prome cu Polis y Ambulance a yega, no obstante e impacto fuerte, asina mes e ocupantenan a baha di e vehiculo Kia K2700 y sak den otro door di golpinan ricibi.
Ora cu personal di emergencia a yega, nan a bin topa cu e victimanan abao riba e asfalt cayente di e merdia aki. Mesora Paramediconan a cuminsa duna asistencia y a preparanan pa bay Hospital. Dado momento den e tension, esnan envolvi a bay reclama e auto cu a dal nan.
E pickup flatbed Kia a sali di e T-weg posiblemente sin mira e Skyline maneha pa un hoben, cu a dal duro contra e vehiculo. E pida caminda aki ta peligroso, segun habitantenan mes a admiti, como cu bo no tin bon bista riba trafico cu ta bin di man robez (for di pabao).
E chens ta grandi cu Polis di Trafico lo a haci uzo revisando Security Camera den e area, pa por confirma e causa di e accident duro aki.
