Diasabra mainta na Hospital...
ORANJESTAD (AAN): Tabata siman pasa Diahuebs poco despues di 6’or di atardi cu diferente unidad di Polis, y a lo menos 3 Ambulance, y tambe Rapid Responder a mobiliza rumbo pa beach di Arashi pa caso unda landadornan a haya problema. Lama tabata bruto, y a logra saca un dama hulandes sin pulso for di e olanan y trece na oriya. E agente policial Wester mes ta esun cu a logra sak’e, y na caminda caba ora a hinke den un rubberboot, a cuminza cu CPR riba dje, pero e no tabata reacciona mas.
Mesun momento a saca un otro dama hulandes cu problema na un distancia basta grandi for di oriya di lama. Aki tambe a cuminza CPR, y ora cu Paramediconan a yega, nan a tuma over. Como cu e victima aki si a logra hala rosea bek, nan a stabiliz’e, y despues a bay cu ne cu urgencia pa Hospital.
E prome dama cu a ser saca lamentabelmente no por a wordo rebiba, y a yama Docter pa constata morto. E ta un dama hulandes di 53 aña di edad.
E otro cu si a sobrevivi, a keda hospitaliza den Unidad di Cuido Intensivo. Sinembargo riba Diasabra mainta, vocero policial Liliana Rasmijn a ricibi e tristo informe, cu e dama aki tambe a fayece.
E ta un dama di 49 aña, naci y biba na Hulanda. Su nomber, ni inicial no a wordo suministra door di Polis. Na famianan di e fayecida, DIARIO y Cuerpo Policial ta manda palabranan di condolencia.
