Persona preparando pa dera su compañero riba beach
- Varios bulto di droga a wordo confisca
- Un persona indocumenta a keda deteni
ORANJESTAD (AAN): Loke a keda registra na final di siman pasa, y cu a wordo comenta hopi ta demostra keto bay con peligroso e cruzamento di e pida lama entre Venezuela pa Aruba ta. Specialmente e dianan aki cu biento ta supla fuerte, y esaki a cambio ta pone cu lama na costa di noordoost te cu noordwest di Aruba, ta extra bruto.
Extra bruto, cu e traficantenan humano no ta preocupa mes cu esey. Nan ta yega cu boto tipo yola te cerca di costa panort, y e capitan mes no ta tribi di yega cerca di costa. Y ta obliga esnan abordo pa “bula den lama” bruto ey y purba yega tera.
Solamente esnan cu tin condicion fit y cu por landa bon, ta yega tera. Otronan no tin e mesun suerte ey.
Uza costa como santana: Algo cu a hala hopi atencion, ta cu den fin di siman un drama a registra na costa panort di Aruba, ora cu atrobe boto yena cu hende indocumenta a wordo forza pa bay den awa y purba landa y yega tera. A bin sali na cla cu oficialmente por lo menos uno no a yega cu bida na tera.
Un di e indocumentadonan cu si a logra yega cu bida, a mira e otro curpa y a dicidi riba su mes, cu e ta bay dera e curpa aki eybanda mes. Uzando su mannan como tambe barancanan, el a cuminsa coba un buraco cerca di beach, apenas algun meter leu for di e parke di molina na Vader Piet.
Normalmente cualkier persona cu ta haciendo algo ilegal, lo a djis bay laga e cadaver atras. Pero a lo menos, e persona aki tabatin e opcion di sigui core huy den mondi pa asina e no wordo descubri. Pero e lo a pensa cu esey ta inhumano, y a opta pa keda banda di beach, traha un lugar adecuado pa asina dera su compatriota.
Hende a mir'e di leu: Sinembargo su constante movemento pa coba, hala tera, y busca material crudo pa haci su trabao, a pone cana pazuid-panort, pariba-pabao den e area. Y e movimento aki a wordo observa Diasabra merdia door di personanan den e sector, cu a analisa y haya esaki hopi sospechoso.
Central di Polis mesora a manda un unidad di Polis di San Nicolas rumbo pa e lugar pa asina check kico ta pasando. E patruya a acudi den area di Molinanan di Vader Piet, y nan tambe rapidamente a mira e persona sospechoso y a yega mesora riba dje.
Nan a bin topa cu e persona aki, morto cansa cu curpa tur muha y na tera, y a bin hay'e cu un curpa sin bida di un homber, kende e ta tratando di pusha suficiente den un buraco pa asina dun'e un ‘entiero’ anonimo.
Polis mesora a detene e homber aki, y a nota cu e ta di habla hispano. El a duna autoridad un resumen breve di loke a sosode, y cu el a sinti cu ta su deber civico di duna e persona un graf pa su restonan mortal bay aden.
Dropping fracasa: E unidad Policial a pidi presencia di mas patruya pa asina yuda pa check si e ‘dropping fracasa’ aki lo por tin mas curpa sin bida a spula na costa of no.
Polis pues a pone puzzle hunto y a conclui cu un boto cu hende fuera droga a purba di yega cerca di costa, pero no a logra. Sea tur cos a wordo benta den lama y e boto a regresa, of e boto mes a sink y of dal contra barancanan y keda destrui.
Cu yudansa di Wardacosta di Caribe Hulandes, a logra di scan e area, y a bin haya algun bulto di droga! Esaki nifica cu e dropping aki tabata uno fracasa. Fuera di esey no a haya ningun hende mas den e sector aki. Pues ta trata di un drama na costa cu a produci un detencion, y a haya un hende morto cu casi por poco a hay'e dera den naturaleza.
E ta pone bo pensa, ta cuanto hende indocumenta mas lo a yega di haya un ‘deramento’ inoficial asina na costanan panort di Aruba.
Te cu Diadomingo anochi, ni Polis y tampoco Wardacosta di Caribe Hulandes no a duna ningun relato oficial di loke a sosode.
