Accident entre Volkswagen Beetle y motorcycle Yamaha

ORANJESTAD (AAN): Central di Polis riba Diasabra atardi despues di 3:00 pm, a manda unidad di Polis y Ambulans rumbo pa caminda di Kibaima pa Pos Abao,

na altura di Tanki Flip.  Poco pabao di studio di Bo Guia FM, un accident a socede entre un auto y un motorcycle.

   Polis a yega y ta topa cu un Yamaha CS3 motorcycle abao, y tambe un Volkswagen Beetle mey-mey caminda.

   Parce cu e Volkswagen Beetle tabata saliendo di un T-weg net banda di Tanki Flip 20-B, y a haya un chens pa subi.  El a haci esey birando na su man robez pa bay direccion pariba rumbo pa Tanki Leendert.

   Net e momento ey, e motociclista cu tabata pasando auto a hay'e di sorpresa cu e Volkswagen subiendo caminda.  E motociclista a trata na desvia na ultimo momento, y aki a pasa dal den parti mas dilanti di bumper di e Volkswagen Beetle.  E motociclista a cay cu su brommer despues di dal contra e auto, y a ricibi varios golpi y rasca.

   Ambulans a yega, y Paramediconan a opta pa mihor bay cune rumbo Servicio di Emergencia na Hospital pa mas observacion.