Drive-By Shooting na San Nicolas a laga 4 hende herida

ORANJESTAD (AAN): E prome fin di siman sin cu tin Toque de Queda valido, ta parce cu no a tuma e rumbo tan spera pa trata na mantene e grado di ocupacion na Hospital abao.

   Den e horario di 7’or di anochi te cu 11’or di anochi, autoridad tabatin hopi trabao pa haci pa check si tur negoshi tabata cumpli cu reglanan cu keto bay a keda valido den e Decreto Ministerial di Emergencia.  Enberdad Diamars siman pasa a suavisa e reglanan pa mitiga e brote di Coronavirus, y tabata parce cu algun hende a lubida caba kico por, y kico ainda no por.

   Ora cu e horario di ciere di 11:00 pm a yega, autoridad tabatin toch un tiki alivio cu nada grave a socede riba Diasabra anochi na Aruba.  Pero nan no a spera cu como un ora despues, lo tin un asunto grave ta bati na nan porta.

   Esey ta loke a socede Diadomingo madruga, ora cu dos hende cu urgencia a yega na Warda di Polis na San Nicolas.  Nan a drenta banda di 12:15 am y claramente a mira cu nan ta herida, y mesora a notifica Comandante cu nan tur dos ta herida cu bala.  Fuera den mesun rosea, nan a bisa cu tin dos otro persona mas herida mas severo, y eseynan si ya caba a haya lift rumbo pa Servicio di Emergencia na Dr. Horacio Oduber Hospital.

   E dos personanan cu a yega na Warda di Polis San Nicolas, a divulga na e agentenan cu un rato prome nan tabata un grupo di persona para pafo di American Bar den Caya Captain Rodger, ta combersando.  E lugarnan mes a cera caba pa 11:00 pm, pero nan tabata djis chill pafo ta combersa.

   Diripiente un auto compacto Nissan March a yega cerca, y pasa dilanti American Bar.  Aki un of mas persona den e vehiculo a rek man y cu un arma di candela a los tiro riba e grupo di persona para pafo.  Varios tiro a bay dal den bashi, pero toch un total di 4 hende eyfo a haya herida di bala.  Dos di nan a haya herida mas grave.

   Despues di esey, e chauffeur di e Nissan March a djis primi trot y aleha di e lugar, lagando esnan eybao den panico.  E dosnan cu tabata mas herida, a wordo poni den auto y cu urgencia a sali directo pa Hospital na Eagle.  Pasobra a mira cu enberdad nan ta mas serio.

   E otro dos persona herida, a move como 760 meter mas pabao pa asina bati alarma na Warda di Polis na San Nicolas.  Despues di a tuma nan prome declaracion, e dos personanan aki a wordo hiba na Servicio di Emergencia di ImSan na San Nicolas, unda nan a ricibi tratamento medico pa e heridanan cu no ta mucho di gravedad.  Despues di a haya e tratamento necesario pa stop sangramento, nan por a bay cas.

   Mientras tanto, Polisnan a yega na e area di sucedido pa asina seya esaki pa evita cu tin contaminacion di prueba.  A pone Recherche, y tambe funcionarionan hudicial forensico di BFTO pa yega na e lugar pa saca potret di tur cos cu por haya eybao.

   Polis a bay check tambe kico a pasa cu e dos personanan cu a yega na Servicio di Emergencia na Hospital.  A bin haya sa cu nan a ricibi atencion mesora, y a logra stabiliza ambos pashent.  Sinembargo Specialistanan a haya cu ta necesario pa nan keda interna, no obstante nan situacion ta stabil.

   Ademas di Recherche y BFTO, a pone Slachtofferhulp tambe na altura pa asina duna un man na e situacion aki.  Polis tin hopi atencion pa e caso, y ta buscando pa haya security video di diferente negoshi eybanda.

   Oficialmente prensa no a ricibi informe si e victimanan aki tur ta hende local, ni si nan ta homber of muher.  Pa colmo e relato di Polis ta menciona un caso di “tiramento”, pero nan ta manda un grafico pa prensa usando e palabra “tiroteo” cu ta full un otro nificacion, y cu ta indica cu e victimanan tambe a los tiro bek.   E speranza ta cu e siman aki lo haya sa mas informacion si acaso tabata un tiramento of un tiroteo.

   Vocero Policial Liliana Rasmijn a indica na DIARIO, cu Polis ta sigui cu e investigacion, y encarecidamente nan ta suplica cualkier persona cu a mira algo tambe, of sa di algo pero cu a aleha di e lugar, pa nan yama Tipline di Polis na 111-41.  Corda cu bo anonimidad ta garantiza.