Den mesun siman auto a dal otro peaton adulto mayor

E biaha aki na Calbas pa Kudawecha

ORANJESTAD (AAN): Den e mesun siman cu un accident fatal a keda registra na San Nicolas unda un persona adulto mayor a perde su bida, awor riba Diahuebs anochi algo similar a socede riba caminda di Calbas pa Kudawecha.

   Banda di 9:00 pm, diferente patruya di Noord a mobiliza poco pariba di Veld di Kudawecha, un yamadanan a drenta cu un biaha mas auto a dal un persona.

   E prome patruya cu a yega, a bin nota cu aki no ta trata di un auto, sino mas bien un vehiculo Nissan Pickup Double-Cab color preto cu number A-50221 cu a dal e peaton.  E pickup tabata moviendo di Calbas rumbo Kudawecha y Sabana Liber.

   Polis a core pidi pa Ambulance yega cu maximo urgencia, debi cu e victima masculino ta benta abao riba caminda, y e ta mustra di tin bastante golpi na curpa.  E caminda dilanti 99 Bar & Restaurant a wordo cera, y dos unidad di Ambulance a yega pa presta asistencia.

   Specialista Policial di trafico tabata papiando y tumando dato di testigonan y tambe tabata papia cu chauffeur di e Pickup Nissan cu a dal e peaton masculino.

   Paramediconan a actua mesora y a lanta e victima, un homber di edad cu tabata actua straño y a pone den ambulance.   Algun minuut despues, por a mira e ambulance sali cu velocidad halto tanto cu zwaailicht y sirena direccion Servicio di Emergencia na Hospital.