Decision extremo di un hoben a laga monton di empleado, turista y tambe Polis den shock

Acto tristo for di 7 piso di Hotel

ORANJESTAD (AAN): E ta un hoben cu den ultimo diez añanan a bin ta pone hopi mensahe riba social media, cu contenido di sosten, encurashamento, conseho, y empuhe na su amigonan.

Su mensahenan di amor, di compasion, y di inspiracion tabata mustrabo cu Dawryn Semeleer mihor conoci como ‘Jhon’, ta un persona cu tin e palabranan corecto y positivo pa bo celebra bida tur ora!

Pa su amigonan, e ta conoci como Jhon Semeleer, e persona cu ta biba banda di caminda grandi di Noord pa Palm Beach y cu tin un circulo di amistad grandi. Regularmente e ta presenta cu dichonan, y tambe su opinion riba bida en general pa asina duna su granito di arena na e trayecto di paz y trankilidad pa tur hende.

Cu su forma unico di cuminza combersacion cu hende, y tambe su amabilidad, a pone cu el a cuminza sobresali trahando den Divi Vacation Ownership Sales pa bende timeshare cu turistanan, y regularmente tabata ricibi bon reaccion pa cu su logronan.

Amigonan a hasta bira contento ora cu recien el a haya un pareha y ta convenci cu awor si bida lo bay ta aun hopi mihor pa Jhon.

DEPRESION: Sinembargo amigonan a bin nota cu na varios ocasion, Jhon tabata manda mensahenan cu ta hopi profundo, y si bo haci analisis di dje na final bo ta ripara cu e tabata manda un mensahe di auxilio, pa pidi yudanza, y guia necesario. Semper e mesun amigonan tabata manda mensahe pe di sosten.

Su suplica pa yudanza, tabata algo manera surreal, como cu apenas algun tempo, ta Jhon mes tabata yudando hopi hende riba e isla aki. El a yuda hopi di su amigo y desconocinan pa asina nan habri wowo y mira solo y hole e flornan mihor. Y na final a bin mira cu Jhon mes tabata sclama pa yudanza.

Apenas luna pasa, DIARIO a duna amplio detaye riba e presion enorme cu tin pa cu cuido sicologico na Aruba, y e hecho cu debi na presupuesto limita, e actual organizacion di RESPALDO no por duna yudanza mes rapido mas.

Apenas 4 siman pasa, RESPALDO a bati alarma riba salud mental na Aruba. E lista largo di espera (wachtlijst) aki nifica cu algun persona lo haya turno te aki 12 luna.

Desde su comienzo, Respaldo a bin ta trahando duro pa reduci e lista di espera aki cerca adultonan. Nan a hasta bin cu dos FACT-teams cu a logra di atende personanan cu problemanan complica, na nan cas mes.

Pero e pandemia di Covid-19 a pone cu e cantidad di persona (adulto y mucha) cu ta rekeri atencion pa cu salud mental, a crece rapidamente. E unico cu no a crece ta Respaldo, y casi semper e excusa cu ta wordo duna ta cu Gobierno no tin placa pa esey. A hasta purba di pone e trato di e personanan aki wordo paga via AZV, pero esey (te ainda) no ta socede.

DIARIO a publica tambe con poco placa a inverti den organizacionnan di Salud Mental na Aruba, compara cu loke ta ser gasta na Curacao, y tambe na BES-Eilanden, y tambe na Hulanda. Masha poco placa mes Aruba a gasta den GGZ.

DECISION EXTREMO: Tabata poco prome cu 10:00 am, cu autoridad a ser yama pa acudi cu urgencia na Divi Phoenix Resort pa yuda cu un rescate. E prome unidadnan di Polis a bin haya sa e embergadura di e situacion, y inmediatamente a pidi pa manda lo mas tanto Polis posible na e lugar, incluyendo yudanza di Cuerpo di Bombero.

A resulta cu Jhon Semeleer dado momento no tabata por mas cu e situacion, y el a logra haya acceso na un di e cambernan di e piso mas halto na su trabao na Divi Phoenix, pa drenta eyden. Tabata Room #772 unda el a drenta y na final a lock e portanan bek. El a bay na e balcon pafo y aki kier a comete algo extremo. Esnan abao cu a mira esaki a bati alarma.

Como cu no por a drenta den su camber, e prome Polisnan a yega na balcon di e cambernan na banda, y a cuminza papia na un forma trankil cu Jhon pa e deshaci di e idea. For di e area di hardin tambe tabatin hende gritando Jhon pa e no bula, y tambe cada rato cu “God loves you”. Mas Polis y Bombero a keda yega, y asina nan a sigui bay para riba otro balcon cu tambe expresando palabra pa descurasha Jhon pa ehecuta su plan, pasobra tin hopi solucion pa tur problema.

Pero Jhon na final a dicidi na sigui cu su plan y a bula. Prome cu esey el a pone un mensahe riba su Facebook pa despedi di tur hende.

E bista di e bulamento a laga tur testigo keda cu un horor atras, y publico abao a cuminza yora di mira e acto ey.
Pa 10:55 am Dr. Texier a constata morto di Dawryn ‘Jhon’ Semeleer. E caso aki a crea un trauma pa tur e demas empleadonan di Divi Phoenix cu a mira y sinti ora cu nan colega stima a tuma e decision extremo. Vocero di Polis Lito Lacle a indica cu como 48 empleado a keda tristo y tabatin mester di yudanza profesional pa sobrepasa e pena grandi aki. Slachtofferhulp di Polis a haya yudanza di Sociale Zaken y demas stakeholders pa duna sosten.

Lacle a indica cu como 9 agente policial tambe mester a haya sosten pa e experiencia fuerte aki cu nan a pasa aden.

Lo mas ta e turistanan cu a presencia tur esaki, cu tambe a keda den shock y mester a haya yudanza. Algun a keda asina hostina di loke a pasa, cu nan a hasta dicidi empaketa maleta y check-out di Hotel.

Na famia-, amigo-, colega-, y demas amistadnan di Jhon Semeleer, DIARIO ta manda su mas profundo palabra di condolencia.

Personal di Aurora Funeral Home a transporta e restonan mortal pa Mortuario na Hospital.