ORANJESTAD (AAN): Tabata Dialuna banda di 5:20 pm, cu Central di Polis a dirigi patruya di San Nicolas na Rooi Koochi pa un homber cu probablemente ta circula riba caminda publico cu un arma di candela.
Segun Central di Polis, cu e homber ta bisti cu carson blauw y cu T-shirt shinishi scur.
Yegando na altura di Noord Cura Cabay, polis a bin topa un homber cual ta cuadra, cu e descripcion suministra pa Central di polis.
E homber tin den su poder un obheto den su man, y e tabata parce un arma di candela. Polis a acerca e ciudadano di inicial H.
Aki ta unda e ciudadano H. a bisa, cu un rato prome el a worde atraca door di un persona desconoci.
Pero e tabata hopi rapido, y el a logra na kita (desarma) e atracador desconoci di e obheto.
E atracador a keda sin arma. Despues cu e atraco a fracasa, el a ranca careda y desaparece.
E ora H. a entrega polisnan e arma cual ta parecido na un arma di candela. Polisnan a constata cu e arma ta parecido na pistol di aire y e arma ta cubri cu tape preto.
E pistol di aire a worde confisca y ademas Central di polis y hefe riba servicio a worde poni na altura. Awor ta investigando mas detaye di e atraco fracasa aki.
