ORANJESTAD (AAN): Dialuna mainta banda di 9:20 am, un unidad di Polis a ser manda na altura di De Palm Pier na Palm Beach,
como cu tin un landador cu ta confrontando problema. Ora cu Polis a yega eynan, a bin sali na cla cu un dama di edad grandi posiblemente a hoga eynan. Den e prome bista, Polisnan a mira cu e dama ta abao riba beach y rondona pa mas hende. Tabatin tres dama cu tabata ocupa ta practicando CPR riba dje. E tres damanan aki a bisa cu nan ta turista, pero cu nan tin training pa enfermero encarga cu situacion cardiologico.
Mientras tanto dos unidad di Ambulans a yega, y paramediconan a core na pia y aki a tuma over e trabao di CPR, y a conecta mashin pa monitor curazon. E dos unidadnan di Paramedico despues di un rato a stop cu nan trabao, y a informa Polis cu nan no por haci nada mas pa e victima. E ora a pidi Centro di Alarma pa manda un Docter eynan. Pa 11:00 am, Docter cu a yega a constata morto di e dama M.M. di 79 aña naci na Canada. A pone Central di Polis, Hefe di Servicio, y Bureau Slachtofferhulp tambe na altura.
