Atrobe boto a yega na costa treciendo stranheronan indocumenta y tambe monton di droga

E biaha aki a centralisa na Rincon

• Tres supuesto venezolano a keda deteni
• A haya total di 12 bulto di droga y 6 lifevest 

ORANJESTAD (AAN): Diabierna henter dia cielo riba e isla tabata hopi nubla.  Lama tabatin olanan entre 4 y 6 pia halto, aunke na e parti panort di e isla e olanan tabata mas fuerte aun.  Tur cos ta indica cu autoridad a haya tip cu atrobe boto a yega tera pa trece stranheronan indocumenta, y tambe droga.

   Esaki mesora a activa varios instancia pa acudi den e area, incluyendo Polisnan di San Nicolas, oficialnan di Recherche, funcionarionan di Wardacosta di Caribe Hulandes, Douane Recherche, y oficialnan di Guarda Nos Costa.  E Helicopter di Polis tambe a lanta vuelo e momento ey.

   Diferente unidad di Polis a mobilisa na e lugar, y cu un coordinacion fenomenal cu e.o. Central di Polis y demas oficialnan eynan, a cuminsa busca na un forma tactico.  E yudansa di Helicopter tabata balioso pa busca riba lama y mey-mey di e mangelnan.

   Diripiente un unidad di Polis a canta ‘bingo’, como cu nan a bin topa cu bultonan di droga na costa pariba di Aruba. Tabata na altura di Rincon, unda a bin encontra 12 bulto di droga como tambe 6 vest di salbabida.

   E oficialnan a sigui cu buskeda mey-mey di tur e mangelnan cu tin eybanda, y aki a bin topa tres homber indocumenta bon scondi.  Nan a wordo aresta y probablemente ta di nacionalidad Venezolano.

   Tur tres persona a keda deteni na e lugar mes. Nan a wordo hiba cu Vehiculo di Transporte na Warda di Polis na San Nicolas, unda Fiscal Auxiliar a duna ordo inmediato pa nan keda deteni.

   E caso aki ta den pleno desaroyo, y a keda vigila costa pa mira si acaso por tin mas droga ta spula na costa.  Diferente teamnan di Polis ta na e sitio conhuntamente cu e sosten di Wardacosta di Caribe Hulandes y Aduana.

   Alto Comisario di Polis drs. Ramon Arnhem tambe a bay na e sitio pa mira e situacion y ta felicita e polisnan pa e bon trabao y esfuerso haci pa combati criminalidad.

   Te na ciere di e edicion aki, autoridad no a divulga e peso di droga.

   Departamento di Unidad di Crimen Organiza tin e investigacion aki. Bo tin algun informacion y bo kier keda anonimo por yama e tipline di polis na 111-41.