Autoridad a confirma un total di 4 curpa recupera
- Posibilidad cu 5 hende si a logra subi tera na Aruba
- Dos dama a hoga lagando nan yiunan chikito sin mama
ORANJESTAD (AAN): Manera cu DIARIO a trece dilanti, tabata Dialuna marduga alrededor di 3:00 am, cu dos naufrago cu a landa subi tera, a yega na un cas y bati alarma, pa bisa cu un lancha cu nan tabata abordo pa trata na drenta Aruba scondi, a kapseis cu nan cerca di costa nort, y cu nan ta sospecha cu varios di esnan abordo no a logra sobrevivi.
Asina alarma a wordo bati, y autoridadnan di Polis di Santa Cruz y tambe San Nicolas a wordo manda rumbo pa area di Vader Piet.
Helicopter di Polis tambe a subi bay halto pa asina cuminsa yuda cu e buskeda. Ya ta conoci cu e marduga ey, a bin haya 2 curpa sin bida di dos persona femenino. Tanto Curpa #1 y tambe Curpa #2 a wordo saca for di lama pa investigacion.
Dialuna den dia, a logra mira Curpa #3 ta drief den lama, sinembargo debi na lama bruto e posibilidad ta cu e curpa a bay ‘pega’ bao di baranca y no por a mire mas.
Te casi yegando anochi, e Curpa #3 aki a wordo mira atrobe door di Helicopter di Wardacosta di Caribe Hulandes, kendenan a baha un personal cu cabuya, y esaki a mara e curpa aki na e hoist, y asina a hise den e Helicopter. Tabata trata aki di un cadaver masculino. E tambe a wordo baha na costa pa asina autoridad di Cuerpo Policial Aruba tume over.
Diamars a habri y a bolbe mira Curpa #4 ta drief den lama. Aki personal local, incluyendo refuerzo ricibi di Cuerpo di Bombero, a traha rapidamente, y a logra di sake for di lama y a entrega esaki na Cuerpo Policial di Aruba pa por sigui cu e investigacion den e caso aki. No a divulga oficialmente si ta trata di homber of muher.
Na e lugar por a mira hasta Alto Comisario Ramon Arnhem na e lugar pa pone su mes na altura. Tambe por a mira mas oficial halto di Ministerio Publico, y di Wardacosta di Caribe Hulandes presente. Team forensico di BFTO tambe tabatey pa documenta tur esaki.
Traficacion humano: E descubrimento di cuatro curpa sin bida riba lama ta plantea cuestionnan serio y ta conduci na un investigacion intensivo pa determina e circumstancianan cu a conduci na e evento tragico aki. Autoridadnan ta enfoca riba esun cu a yega ilegalmente na Aruba y nan posibel conexion cu e serie di morto na lama den e ultimo lunanan.
Den pasado a menciona den Corte, cu e hendenan aki ta paga e asina yama ‘Coyotes’ suma di $500 bay ariba te cu $2.000 pa yuda nan cruza e pisa di 27 miya nautico di lama for di Venezuela te cu Aruba. Y historia a demostra cu e chens ta grandi cu e cruzamentonan aki ta finalisa den tragedia.
Famianan na luto: Mientras tanto prensa na Peninsula di Paraguana na Venezuela a divulga cu na pueblo di Las Cumaraguas na municipio Falcon, famianan ta di luto.
Ta conoci den e pueblo, cu tanto Diasabra 9 di December como tambe Diadomingo 10 di December tabatin lancha cu a sali cu e mision scondi di transporta hende pa Aruba.
Diasabra a sali un lancha cu personanan procedente di El Hato, Santa Rita, y otro comunidadnan den cercania. Tabatin tres otro lancha cu a sali Diadomingo for di Tumatey. Pero debi cu lama tabata basta bruto, dos di nan a regresa tera Venezolano bek. Uno so a dicidi na sigui. Esaki lo ta esun cu a tuma rumbo pa pasa costa fuerte di Noordoost di Aruba y cu lo a kapseis y sink.
Dialuna atardi caba, dos potret a cuminsa circula na Las Camaraguas, indicando cu e dos damanan aki ta esnan cu a wordo haya. Uno di nan a wordo menciona como Alexandra Lugo. E otro dama ta Maria Virginia Martinez. Tur dos tin yiu muher cu awor a keda sin mama.
Tin indicacion na Aruba, cu den e lancha cu a kapseis tabatin como 13 persona abordo. Ta menciona cu 5 persona si a logra yega tera, y a lo menos dos di nan a bay bati alarma. Tin indicacion cu uno di nan ta un menor di edad (16 aña) kende a dal su curpa y ricibi herida na e barancanan.
Esaki lo por tin indicacion cu 7 persona no ta conoci si nan a logra subi tera of a keda den lama. E dianan venidero lo sigui check e desaroyo aki.
Mientras tanto pa awe Diaranson, lama na Aruba lo bay ta modera te basta bruto cu olanan entre 4 y 7 pia. E olanan aun mas halto lo bay ta parti Noordoost di Aruba, y lama grandi.
