Dalmento frontal na Savaneta a costa bida di Hubert Maduro

Di 5 morto den trafico -- ORANJESTAD (AAN): Trafico insigur di Aruba a bolbe cobra un bida mas riba Diamars mainta, riba e ultimo dia di Augustus.

   E prome yamada a bin di un unidad di Ambulans di ImSan cu a bin topa cu un accident pisa riba caminda principal di Savaneta, net na e cruzada pa drenta Yaraweg.  Esaki ta 110 meter pariba di La Granja Savaneta.

   A notifica Centro di Alarma di e accident serio aki, y na su turno a core notifica Polis pa 11:10 am di e accident.

   Mesora Central di Polis a dirigi diferente unidad di San Nicolas pa e lugar.  Asina a cera full e pida caminda aki, pa asina personal di rescate por traha sin dolor di cabez.  Centro di Alarma na su turno a manda mas Ambulans y tambe First Responder pa e lugar.

   Vocero di Polis, a bisa cu na yegada di patruya ta bin haya un Kia Rio hatchback color scur cu number A-8841 y un Nissan Cube color scur tambe cu number A-71614.

   Personal di Ambulans a logra saca e chauffeur gravemente herida for di e Kia Rio, y a pone abao pa asina atende mihor.  Como cu e no tabata reacciona bon, a cuminza practica CPR riba dje.  Aunke a dura algun rato, no por a haya ningun pulso di curazon mas.

   E persona femenino di e Nissan Cube a wordo transporta pa Hospital pa ricibi asistencia medico.

   Como cu e chauffeur di e Kia Rio no ta reacciona mas, Paramediconan e ora a pidi pa Centro di Alarma busca un Docter pa bay na e lugar.  Pa 11:40 am, Dr. Ramautar ta constata morto di Hubert Hendrik Maduro di 61 aña di edad, naci na Aruba.

   Specialista di trafico y Polis Tecnico a yega pa asina papia cu testigonan pa check e teoria cu uno di e vehiculonan a tuma un birada mucho grandi.  Lo bay analiza tur rastro di brake y demas declaracion di tur hende.

   Polis a manda busca Slachtofferhulp tambe, cu a presenta na e lugar di e sucedido pa duna sosten na famia.

   DIARIO y Cuerpo Policial ta manda palabra di condolencia na famia di e fayecido.