Dos hende a keda deteni - ORANJESTAD (AAN): Investigacionnan cu a cuminza algun tempo pasa, ta ser haci door di un team special cu ta dedica pa check tur lugar y casnan na Aruba, unda ta conoci cu tin droga ta wordo bendi cu publico.
Esaki ta cay bao di un equipo cu den Cuerpo Policial ta ser yama ‘Project Team Drugspanden’.
Riba Diamars, nan tabatin suficiente informacion pa asina ehecuta un razzia. Asina e personal di Project Team Drugspanden cu yudanza di mas instancia, a subi caya y na final a detene 2 persona y a confisca marihuana y pildonan di ecstasy (XTC).
Project Team Drugspanden ta un team cu a worde lanta pa entre otro investiga bendemento di droga for di un cas.
Esaki a socede Diamars ora cu Project Team Drugspanden a bay na un cas na Pavia y a detene e hoben masculino di inicialnan J.M.Z. di apenas 21 aña di edad naci na Aruba di 21 aña. Tambe a detene e homber J.E.Z. di 60 aña naci na Aruba.
Durante e entrada hudicial a confisca un cantidad di matanan di marihuana y pildonan di ecstasy.
Vocero di Polis, Lito Lacle, a confirma cu diferente team special manera, K9-unit, departamento tecnico di Cuerpo Policial y otro teamnan tambe a participa na e entrada hudicial aki.
Pa Cuerpo Policial por resolve mas caso cooperacion y informacion di pueblo di Aruba ta hopi importante, pesey nan ta pidi si bo tin cualkier informacion yama nos tiplijn di Polis cu ta: 111-41. Nan ta garantisa cu bo ta keda anonimo.
