ORANJESTAD (AAN): Diasabra marduga banda di 4:38 am, chauffeur di un auto sedan a perde control den area di birada na Savaneta,
y debi na esey a pasa, dal, destrui y ranca un palo di luz completo. Esaki a pone cu inmediatamente un area grandi di Savaneta y vecindario a bira scur. E vehiculo a keda basta destrui.
Personal di NV Elmar a wordo poni na altura, y ora cu a yega na e lugar a bin nota cu ta henter un palo di luz di alto voltahe a wordo kibra, y aki tin di bay lanta monton di tecnico for di soño pa nan presenta cu heavy equipment pa cuminza haci e trabao.
Mientras cu personal di NV Elmar a cuminza tuma inventario di loke tin di bay busca pa haci trabao di reparacion, nan mester a warda te ora cu personal di Road Service y Polis a keda cla, y tambe warda te ora cu e auto kibra a wordo kita di eynan, pa asina por cuminza haci trabao.
Di comienso a ripara cu e lo ta un trabao grandi cu lo dura como 7 ora pa keda cla. Personal di NV Elmar tabata extra motiva pa purba caba trempan cu e trabao.
Pesey mes, ya 3 ora despues, esta pa 7:37 am ya a caba di pone e palo nobo di coriente, y tabata cla pa pone tur bracket na e palo, rek wayanan nobo di coriente. Banda di 9:42 am nan a keda cla cu e ponemento di wayanan nobo di alto voltahe, y esey a pone cu mayoria cliente na Savaneta a haya coriente bek. E ora a sigui cu e trabao di keda cla cu instalacion di wayanan di voltahe abao. Na final pa 11:02 am, pues exactamente 6 ora y 34 minuut nan a keda completamente cla y tur hende cu coriente. Despues ta Setar Cable Services mester a rek wayanan di cable-TV.
