Curpa mutila di señora di 60 aña haya den freezer

Crimen hororoso na Solito

• Ningun hende a tende mas di dje desde casi 2 siman caba
• Awor tin wowo riba un sobrino di dje 

ORANJESTAD (AAN): Pa casi dos siman caba, un señora di inicial L.D.P. no tabata presenta na trabao na un conocido Restaurant na Eagle Beach.  Su compañeronan di trabao tabata haya esaki raro, como cu e ta un persona kende semper tey pa cumpli cu su labornan.  Su amiganan tambe a cuminza preocupa cu nan no ta mire.

   Nan a cuminza haya su falta den e di dos siman di November caba.  Un amiga a haya informacion di un persona cu ta biba na su cas, cu e señora L.D.P. lo a viaha pa Republica Dominicana como cu un hende a bira malo aya.  Amiganan a acepta e mensahe, pero despues a cuminza haya raro di con e señora mes no a avisa nan tur cu e ta viahando, y tampoco no a notifica gerencia di e Restaurant.  Tur esaki a cuminza bira manera un puzzle complica.

   Di con diripiente e señora tin di viaha, sin sikiera manda un message pa tur hende?  Ora cu a dicidi na yama Republica Dominicana, e famianan aya abao a keda sorprendi, pasobra ningun momento nan ta sperando yegada di señora L.D.P. na Santo Domingo.

   A bay check su cas: Eynan e misterio a bira mas grandi, y cu cada reaccion e situacion a sigui bira mas y mas raro.  Asina a dicidi den fin di siman pa bay check na su cas pa mira si por mir’e of haya otro indicacion.

   Asina nan a yega na e cas Solito 42-A, cu ta situa como 90 meter patras di Lito Convenience Store, cual tienda ta riba e caminda principal di Playa pa Tanki Leendert.

   E portanan di cura tabata na lock, pues e persona a bula esaki pa bay pa den.  Asina a cana rond y cada rato ta grita e nomber di e señora “Luz” pa wak si e ta contesta.  Ningun contesta, pues tin ningun hende eynan.

   Descubrimento hororoso:  Rond di e cas a bin nota nada.  Pero bista a cay riba un Freezer cu tin eynan, y ora cu a habri esaki, a bin descubri algo hororoso eynan.  Den e Freezer aki tin partinan di curpa humano aden.

   Esaki tabata suficiente motibo cu a core bati alarma Diasabra mainta na Polis.  Mesora patruyanan di Playa a wordo manda eynan, como tambe Recherche di Oranjestad.

   E persona cu a haci e descubrimento, a guia e agentenan pa e Freezer, y aki mesora a dicidi na haci e area completamente steril, seya e cura, y pone autoridadnan competente na altura.  Team Forensico di BFTO tambe a wordo yama.

   Pa e amigo- y amiganan di señora L.D.P., nan a cuminza sinti e tristeza inmenso cu e lo no ta mas na bida, y su curpa lo ta tur mutila den e Freezer.

   Loke Polis a bisa: Vocero di Polis a confirma cu a haya un curpa di hende morto na e adres aki, pero oficialmente nan no por bisa si ta trata di un persona femenino, ni masculino.  Esey ta debi cu su curpa ta tur mutila y “benta den otro” den e Freezer aki.  Fiscal a ser poni na altura y a duna ordo pa confisca e curpa, y tambe e Freezer.  Docter di Team Forensico tambe ta participa den e investigacion.

   Despues di a haci investigacion forensico, riba Diasabra mes a saca e Freezer di e adres y a bay cu ne pa investigacion.  Pero e parcela di cas a keda full seya henter anochi y marduga, vigila door di Polis como cu e ta wordo considera como ‘escena di crimen’.  Su interior a keda wordo documenta door di BFTO, y esey a sigui hasta riba Diadomingo.

   Vocero di Polis a confirma cu diferente articulo den e cas a wordo confisca pa investigacion.  Pero mucho mas detaye no a ser duna oficialmente.  Detayenan den e relato aki a wordo compila door di DIARIO mes.

   Investigacion a start: Ta kico lo a pasa aki cu señora Luz Divina Paulino di 60 aña naci na Republica Dominicana.  Di con informacion ‘eroneo’ y a ser pasa pa tur amiganan cu e lo a “viaha urgente pa su pais di nacemento”, siendo cu e ta den Freezer warda kizas pa casi 2 siman caba.

   Testigonan a duna Recherche un monton di informacion con e amigonan y coleganan di dje na trabao a cuminza sinti cu algo no ta bon.  E estilo di desaparece di señora Luz Divina no ta algo normal di dje.  Pasobra ora e bay Docter mes, e ta informa tur hende.  Y ta nada natural cu e lo haci un viahe y bandona Aruba sin menciona nada na otronan.

   Pero awor focus a bay riba un sobrino di dje, kende a bin biba na Aruba tempo cu e mucha tin 10 aña di edad.  Awor e hoben tin 18 aña, y e ta esun cu a pusha e informacion cu su tanta a viaha pa Republica Dominicana.

   Pakico el a duna e des-informacion aki?  Di con el a duna fake-news di su tia, siendo cu e lo ta morto desde casi dos siman pasa caba.  Esey ta loke Recherche kier sa tambe, pero ta parce cu e lo a bandona Aruba.   Indicacion ta cu e sobrino ta di inicial A.P.

   Cada rato cu e informe a plama, mas hende y conocir tabata yega na e cas, e agentenan pafo ta referi nan pa bay na Warda di Recherche na Wayaca pa haya mas detaye.

   Cuerpo Policial ta pidi cualkier hende cu sa di algo, pa yama Tipline di Polis na 111-41 y nan ta garantiza cu bo ta keda anonimo.

   DIARIO ta manda palabranan di condolencia na famia, amigo- y coleganan di Luz Divina Paulino, y ta desea nan forza e dianan aki.