ORANJESTAD (AAN): Recientemente dos negoshi den un compleho a bira victima di ladronicia.
Esaki a socede riba un Diabierna y tambe Diasabra, caminda e establecimentonan di Sbarro Pizza y Juan Valdez Café na Shiribana 13 a ricibi bishita di ladron.
Y via di security camera a bin haya sa, cu ta e conocido Koki a regresa e area pa bolbe comete su fechorianan. El a bira un persona di multi-distrito, y ta cometiendo ladronicia na diferente lugar.
E prome ladronicia a socede Diabierna ora cu a kibra pa drenta den Sbarro Pizza na Shiribana. Loke exactamente a wordo horta no ta conoci. Pero el a comete e ladronicia hunto cu un persona mas.
Ora cu a kere cu e lo a move pa otro distrito, ata Diasabra marduga un biaha mas mesun Koki a bay comete ladronicia na e negoshi net pabao di Sbarro, esta Juan Valdez Café.
Polis a yega pero un biaha mas e ladronnan ya a move bay. Pero ya caba autoridad sa ta kende ta e sospechosonan, y lo bay sigui busca rond pa pone man riba nan.
