Cuerpo Policial cu honor a despedi di Sir. Jose ‘Chaco’ Cornelio

ORANJESTAD (AAN): Despues di 43 aña di servicio Cuerpo Policial Aruba a despedi di Sir. Jose Cornelio, mihor conoci como Chaco.

Un persona cu un trayectoria largo cu a dedica cu alma, pasion, tempo y dedicacion na Cuerpo Policial Aruba.

   Sir. Chaco a cuminsa su carera policial cu solamente 19 aña di edad. Na aña 1978 el a cuminsa como Hulpagent pa Cuerpo Policial Antiyas. Despues el a  sigui na aña 1982 nastraatdienst Oranjestad. E mesun aña aki el a sigui pa departamento di Narcotica.

   Pero tabata na aña 1986 na momento cu Aruba a haya su Status Aparte cu e mester a bolbe scol di polis back pa asina e por bira polis oficialmente. Como un di e prome klasnan Chaco su carera no a caba pero a crece den conocimento y cu amplio experencia.

   Chaco a haya e oportunidad na aña 1988 na unda el a drenta departamento di Recherche di Oranjestad y t’e cu dia di awe na aña 2021, Chaco a keda labora na e departamento aki.

   Den su tempo liber Chaco a dedica su tempo na muchanan den arte marcial. E ta un persona reconoci den e area aki y un persona de. top como referee den e deporte aki. Ta danki na su dedicacion y amor pa locual cu e ta haci Chaco ta un ridder den Orde van Oranje van Nassau. Un hall of famer na nivel mundial y Grand Master den diferente arte marcial.

   Amigonan, famia y coleganan a organiza un despedida chiquito pa Chaco. Como sorpresa a busca Chaco na su cas y asina bou guia di unidad motorisa a dirigi Chaco pa su ultimo dia di trabao hunto cu su amigonan di antes.

   “No ta algo cu mi a spera na momento cu mi a wak e unidad motorisa yega mi cas.” Tabata e prome reaccion bou harimento di Chaco.

   Amigonan di antes manera Carlos Hodge, Sr. Sambo, Sr. Paulina, Sr. Krozendijk tabata un par di e tantisimo amigonan cu a bin celebra Chaco su ultimo dia. Chaco a ricibi como reconocimento un petchi di polis diseña pa Sr. Brown y cu a worde traha na Hulanda. Un atardi yena cu chiste y bon recuerdonan di antes.

   Como tradicion Chaco a haci su ultimo yamada via radio di polis na Central di Polis. Tur unidad y departamento special a duna honor via radio di polis na e ultimo yamada y mensahe di Chaco. Un momento cu sigur a yena tur persona cu emocion.

   Na final di dia Chaco a traspasa e batuta pa e hoben Recherche cu ta bay sigui y maneha e departamento. “ E prome cos cu bo mester siña ta e respet y disciplina. Bo no tey pa escala e problema. Un medaya tin tres banda. Prome cu bo kier judge un hende wak tur e bandanan di medaya, asta e rand ta un banda.”

   Danki pa bo esfuerso, dedicacion y tempo na Cuerpo Policial Aruba. Danki na Chaco su famia pa e tempo cu el a dedica na nos cuerpo. Nos comunidad por ta orguyoso cu nos tabata tin un persona manera Chaco cu a dedica alma y cuerpo pa combati criminalidad y awor su conocimento a worde traspasa pa e hobennan. Disfruta di bo pensioen, bo merece esaki y muchu mas! Danki Sir. Chaco!