ORANJESTAD (AAN): Cuerpo Policial Aruba a celebra su 38 aniversario. Diabierna 16 di Augustus a celebra e gran dia aki cu un Santo Sacrificio di misa na Iglesia Alianza Evangelica na Oranjestad.
Den presencia di Minister di Husticia y Asuntonan Social sr. Rocco Tjon, Presidente di Parlamento Sr. Edgar Vrolijk, Procurador Generaal Amalin Flanegin, Hefe di Koninklijke Marechaussee, Hefe di Mareniers Kazerne Savaneta, altocomisario di polis drs. Ramon Arnhem, Staff, personal administrativo, agentenan policial conhuntamente cu nan pensionadonan a celebra e dia importante aki.
Alabes tabatin parlamentario mr. Molina, Tromp y Kamperveen conhuntamente cu Sindicato di Polis Korsou y Sindicato di Douane di Aruba cu tambe a atende e santo sacrificio.
Den union so nos por a yega 38 aniversario. Trahando hunto cu otro y cu nos partnernan nos ta mira cu nos a crece den profesionalismo y nos lo sigui padilanti. Tabata altocomisario di Polis durante su discurso.
Despues di e Santo Sacrificio tabatin un koffiemorgen pa asina por a pasa un tempo ameno cu otro y recorda e bon momentonan pero tambe e momentonan difícil cu KPA a pasa aden.
Awendia nos por conta cu mas o menos 530 polis y personal administrativo trahando incansablemente pa brinda seguridad na nos pueblo. Ta trata aki di hende homber y muhernan balente trahando den 4 districto, cu ta warda di Polis situa na Oranjestad, Noord, San Nicolas y Santa Cruz.
Durante aña por conta cu diferente unidad special cu ta forma parti di nos organisacion manera: Unidad Motorisa, Unidad Canino, Team di Aresto, Mobiele Eenheid, Duik Team, Kust Surveillance, Helicopter Unit, Surveillance, Team Narcotica, Unit Georganiseerde Criminaliteit, Flex Team, Radarkamer y sin lubida e departamentonan conoci di recherche cu ta bon entrena y capacita pa investiga y soluciona casonan mas complica.
Durante aña Cuerpo Policial Aruba su nomber ta wordo reconoci cu hopi respet internacionalmente entre otro manera DEA, FBI, RCMP, Force Protection Agency, ACCP y IACP. Tambe trahando den cooperacion estrecho cu Cuerpo di Polis di Reino Hulandes manera, Korps Politie Rotterdam, Rijmond, KLPD, RST, Korps Poltie Curacao, Korps Politie Caribisch Nederland, Korps Politie Sint Maarten y mucho mas.
Comunidad por ta orguyoso di su Cuerpo Policial Aruba cu su 38 aña di crecemento y lo sigui crece cu bista riba futuro. Pabien na cada un colega policial, staff y personal administrativo cu ta haci nan trabou cu dedicacion, tempo y pasion pa brinda lo mihor pa pais Aruba. Sin lubida danki na cada famia pa nan aprecio, comprension y sosten na cada polis cu ta sirbi Pais Aruba.
