Cuerpo Policial a sigui cu exito e workshop ‘Obeya’

ORANJESTAD (AAN): Cuerpo Policial Aruba (KPA) ta sigui inverti firmemente den desaroyo y profesionalismo di su personal.

  Durante un siman intensivo, tanto personal como hefenan di e diferente departamentonan den KPA a forma parti di un workshop bao nomber di “Obeya', lidera pa e experto sr. Tim Wiegel di Hulanda.

   E training aki tabata tin su enfoke principalmente riba liderazgo, miho prestacion laboral, cooperacion y un nivel mas halto di profesionalismo den e organisacion.

   Altocomisario Arnhem ta keda boga pa inverti den e recurso humano di KPA mediante diferente curso y formacion continuo.

   “Mi ta masha contento di tabata testigo di e gran compromiso di tur e participantenan, kendenan desde principio te final a duna 100% di nan parti. Mi ta orguyoso di mira mi hendenan desaroya y supera nan mes. Un workshop cu ta enfoca riba liderazgo ta netamente loke ta fortalece e futuro lidernan den nos organisacion,” altocomisario Arnhem a expresa.

   Cuerpo Policial Aruba ta manda un caluroso pabien na cada Polis cu a forma parti di e workshop aki, aportando positivamente na nan crecemento profesional y na bienestar di Cuerpo KPA.