Como 75 polis a zorg pa evita aglomeracion durante entrega di listanan politico, incluso den trafico

Inspector Lito Lacle di KPA:

ORANJESTAD (AAN) – Manera ta conoci, Diabierna 7 di Mei aki, a tuma lugar na Censo, e entrega di lista di e candidatonan di partido politico, cu lo bay participa den e contienda electoral, dia 25 di Juni proximo, unda pueblo lo scoge un Parlamento nobo.

Inspector di Polis Lito Lacle, a duna un declaracion na prensa tocante e manera con e entrega di lista tabata desaroyando. Lacle a comenta cu polis tabata tey for di 8.30’ or di mainta, y KPA a prepara su mes for di un par di siman atras caba.

Incluso polis motoriza tabata coriendo rond tambe pa sortea e trafico, tanto siguidornan di partido como den trafico riba camindanan rond. El a splica e manera con e proceso mester a bay, for di momento cu dos persona di cada partido yega unda  DOW a pone baricada, pasa, subi trapi bay ariba entrega lista, baha bay entrevista cu prensa, y retira. Di  manera aki a preveni (mirando e situacion di covid-19 cu ainda ta vigente) sin pone distanciamento social, ni aglomeracion.

Durante e ultimo reunion di KPA cu partidonan politico, tur esaki a wordo splica, pa asina evita aglomeracion pa e virus no sigui plama rond, Lacle a reitera. Esaki a keda un tarea comun di tur partido politico, pa tur cana den mesun direccion.

Durante e evento aki tabata tin mas of menos 75 polis riba pia, na diferente parti strategico,  pa evita aglomeracion den trafico tambe. Lito Lacle a expresa cu si e pueblo wak e politiconan comporta nan mes manera mester ta, e pueblo tambe lo comporta su mes manera mester ta.