ORANJESTAD (AAN): Autoridadnan di Colombia a duna informacion di un accion riba lama tras di un speedboat tipo Go-Fast,
cu na final di cuenta a wordo intercepta panort di nan pais, na un area di lama grandi cu ta como 288 km west di Arashi Beach na Aruba.
E accion di Colombia aki contra narcotraficante, ta forma parti di un operacion multinacional, hunto cu Armada di Colombia, y e Joint Inter Agency Task Force South (JIATF-S) di Merca. Asina a logra captura riba di 400 kilo di cocaina cu tabata abordo di un speedboat tipo Go-Fast cu a sali for di area di Puerto Bolivar (na departamento di La Guajira) y tabata bayendo nort.
E resultado aki ta producto di e constante esfuerzo operacional di vigilancia y control haci pa Armada di Colombia, hunto cu tur partner internacional den Caribe. Aparentemente un avion di JIATF-S a detecta e speedboat aki, y mesora a informa autoridad Colombiano.
Colombianonan a baha un boto di Unidad di Reaccion Rapido di Guardacosta Colombiano, un patruyero Oceanico, y un unidad di avion di Armada di Colombia, pa asina yuda localiza esaki.
Durante varios ora tabatin un persecusion riba lama grandi, pasobra esnan den e Go-Fast no kier a stop pa nada di mundo, y nan a cuminza tira bulto di droga den lama. Na final cu tactica a logra di stop nan toch. Abordo a bin haya 3 persona. E bultonan cu a keda drief a wordo saca di lama, y nan a yega na 21 total. Den nan a bin haya 549 paki.
E droga hunto cu e speedboat y esnan deteni a wordo hiba bek pa un Pier na costa di Colombia den Caribe. Pero debi na lama bruto, olanan a pone cu e speedboat cu tabata wordo lastra a sink. Mester a corta e cabuya pa lage bay abao pa asina no trece e cutternan Colombiano den problema.
E peso total di e droga a yega na 416 kilo. E cargamento aki tabatin un balor di 20 miyon Dollar riba caya na Merca. E tres tripulantenan ta dos Venezolano y un Colombiano.
