Altocomisario a reconoce Comisario Gordon pa su bon trabao

ORANJESTAD (AAN): Forsanan silencioso ta hopi balioso. Mester elogia y reconoci nos coleganan policial pa nan aprecio y dedicacion pa locual nan ta haci cu hopi biaha no ta wordo mira.

   Den e caso aki tin di para keto na Sra. Irma Gordon comisario di Cuerpo Policial Aruba. Señora Gordon tin amplio conocimiento y experiencia di nos organisacion policial. Tambe señora Gordon ta miembro di mas aña den e maneho di KPA cu ta Korps Mangement Team (KMT) como e parti operacional di KPA.

   Na varios momento tambe Sra. Gordon a fungi como Altocomisario Interino di KPA na momento cu e altocomisario tabata ausente.

   Den periodo di September 2021 te cu augustus 2022 Sra. Gordon a guia KPA den momentonan difícil como altocomisario interino.

  Semper Sra. Gordon tabata disponible y a mustra su liderazgo tur momento y nos di KPA ta hopi agradecido pa Sra. Gordon cu semper tey.

   Den e cuadro aki recientemente altocomisario drs. Ramon Arnhem a convoca un reunion di caracter di urgencia pero di sorpresa pa Sra. Gordon. Na su yegada el a haya aplauso fuerte den presencia di altocomisario, Minister di Husticia Arthur Dowers, famia y coleganan. A reconoce Sra. Gordon cu un “Oorkonde” pa su trabou desplega como altocomisario interino como tambe a haya un bunita recuerdo pa su trabou brinda. Sra. Gordon no a spera esaki y el a yena cu hopi emocion mirando cu el a wordo reconoci.

   Minister Dowers y Altocomisario a hiba palabra di gratitud na sra. Gordon. A gradicie y a elogia e bunita trabou cu e ta haciendo te cu e dia di awe.

   Cuerpo Policial Aruba ta gradici Sra. Gordon pa su dedicacion, tempo y servicio. Nan sa cu  por conta riba dje pa hopi aña mas. Masha pabien y hopi danki.