Durante fin di siman
ORANJESTAD (AAN): Campaña politico a start cu biento en popa!
Y e biaha aki, publico ta extra atento pa mira si e politiconan ta cumpli cu protocol y reglanan sanitario, sino mesora ta core yama Polis.
Vocero Lito Lacle di Cuerpo Policial, a confirma cu den fin di siman cu a pasa, nan a atende cu en total di 28 asistencia cu tabatin di haber cu campaña politico
For di algun siman caba Cuerpo Policial a asigna un comision pa atende tur problema rond di campaña electoral pa 2021.
Eleccion 2021 lo ta dia 25 di Juni 2021, y algun siman pasa caba Polis a organiza un reunion pa asina sera conoci cu tur e personanan di contacto di tur partido politico y despues a reuni cu cada partido politico individual caminda a papia cu nan over e Decreto Ministerial y ki strategia nan a bay usa pa cu nan campaña.
A cumbini cu tur partido cu Cuerpo Policial tur tin un solo meta en comun y esey ta pa preveni e contagio y plamamento di Covid-19 y cu esey den mente nan mester tene na cuenta cu aglomeracion, mantene Distancia Social y e uso di Tapaboca.
Pues cu otro palabra 2 hende hunto, distancia di 1,5 meter for di otro y preferibel no ta drenta cas y ta keda pafo scucha e personanan cu ta biba na e cas.
Di e 28 asistencia cu Cuerpo Policial cu bay relaciona cu campaña politico por a constata cu varios partido politico no a tene nan mes na e palabracionnan haci y a atende nan ariba esaki.
Cuerpo Policial ta pone enfasis cu tin un Decreto Ministerial cu mester atene na dje y durante nan encuentro semanal lo repasa y evalua hunto cu tur partido politico.
Cuerpo Policial tin e obligacion pa percura pa tur hende cumpli cu e leynan poni den e Decreto Ministerial y no por tolera y ta condena cu e leynan aki worde kibra.
