Caso grave di criminalidad contra un persona di edad - ORANJESTAD (AAN): E ciudadano fam Harms, cu ta un persona di 84 aña,
a relata den entrevista cu DIARIO e experiencia cu el a pasa aden ora cu e homber a drenta den su cura pa comete atraco. Esaki a sosode den e bario di Brazil.
El a splica cu e tabata sinta den veranda di su cas, anochi, cla pa bay paden pa haci su oracion. Net ora cu el a caba di haci su oracion, para riba stupi den su veranda, diripiente un persona a pasa bula riba e porta chikito.
E persona aki a bay directo riba dje y dal'e un mokete mes ora. Fisicamente, e tabata sinti bon e momento ey, pero asina mes del a ripara cu dos otro hende a bula drenta den cura bay paden. Tabata tres homber contra dje. El a purba scapa, pero e tres anti socialnan a bent'e cu skop y mokete te na vloer, a bisa.
Un di e hombernan a ranca su dos cadena, su holoshi y tambe purba kita su renchinan. E momento ey, su casa cu tabata den camber wak TV a ripara cu algo tabata pasando pafo.
Harms a bisa cu el a dal un grito. El a saca forsa for di unda no tabata tin. El a grita: "Mami!!!" y manda un pida riba e homber. E hombernan a core sali.
Manera cu e por a lanta for di e vloer tur golpia, el a logra bay den camber cerca su casa y a bise kico a caba di sosode. Mesora a yama Polis y mesora Polis a yega, a relata.
Dos patruya di polis a presenta na su cas. Ambulans tambe a acudi y den un rato di ora e cas tabata yen di hende.
Cu ambulans a hiba meneer Harms Centro Medico na San Nicolas pa haya tratamento.
Locual e ta lamenta ta cu e caso aki no a sali den prensa ya cu e caso aki ta algo grave. El a bisa cu e ta un persona di casi 84 aña y e ta biba na e cas cu casa. E tin un famia di 6 miembro. E, su casa y 4 yiu. Tur yiu ta mayor di 50 aña.
Pa e lucha cu tres homber no tabata algo facil. E no sa ken e personanan aki ta. Nan tabata tin nan cara tapa. "Mi a considera e caso aki manera ora cachonan brabo ta drenta den cura di cabrito y tur kier morde. Mokete ta bin, mokete ta bay y skop, pero nan no por a tuma mi", el a expresa.
Sr. Harms a keda den hopi mal estado di salud fisicamente despues di e atake aki, pero e ta spera cu pronto por haya e criminalnan aki ya cu e abuso aki mester stop.
