Accident cu hopi daño material den Avenida Milio Croes

ORANJESTAD (AAN): Esaki tabata un fin di siman di masha hopi accident di trafico na Aruba, principalmente anochi laat y den madruga.

   Ta parce comosifuera e tabata un weekend normal di antes, na aña 2019.  Tur hende aparentemente kier bay bek na normalidad, pero tin di corda cu no ta tur hende a vacuna, y cu tin di tene cuenta cu casonan di Covid-19 ta aumentando.

   Diasabra anochi a drenta informe di un accidente cu hende herida riba Avenida Milio Croes. Mesora a dirigi tanto polis como ambulans na e sitio. Na yegada di e patruya a bin compronde cu aki ta trata di un accidente entre dos auto unda e chauffeur di un Mitsubishi Lancer color blauw cu number A-29276 a perde control y bay dal den trafico cu tabata bin di direccion contrario, esta un Suzuki Swift color preto.

   Debi na e impacto, e Mitsubishi Lancer a sufri basta daño material na su banda dilanti, y tambe na su banda patras.  Por a nota cu masha hopi piesa di auto a spat rond riba caminda.

   Tabatin hende herida, y pesey a pidi presencia di Ambulans.  Paramediconan a yega den e caya mes a duna asistencia na e heridonan, pues no tabata necesario pa hiba nan Hospital.  Potretnan cortesia awe24.com