Chauffeur pata-pata a ocasiona accident fuerte pabao Edificio di Piet

ORANJESTAD (AAN): Tabata dia 25 di December, Pasco atardi algo prome cu 4'or, cu Central di Polis a core manda unidadnan di Playa net panort di

e rotonde di De La Sallestraat cu Professor Lorentzstraat y Caya Ernesto Petronia pa un accident basta serio, unda dos auto a dal frontal den otro.

   E prome unidad di Polis cu a yega, a bin topa como 15 meter panort di e rotonde, riba Caya Ernesto Petronia, pabao di e lugar conoci como ‘Edificio di Piet’, cu dos auto compacto kibra.

   Ambulance tambe a yega eynan mesora, pasobra Centro di Alarma a ricibi informacion cu un di e chauffeurnan no ta reacciona.

   E chauffeur ey ta den un Hyundai Grandi i10 color cora cu number A-28708 y e tabata bin for di panort riba Caya Ernesto Petronia bayendo direccion centro di ciudad.  Pero aki ta unda cu el a cuminza core na banda robez di caminda, y dal violentamente contra un Chevrolet Spark color preto cu number A-78414.  E impacto tabata semi-frontal.

   Ambos auto a bay finaliza cerca di e acera dilanti La Diferencia Laundry cu ta den Edificio di Piet.

   Ora cu Paramediconan a cuminza atende e chauffeur di e Hyundai, a bin nota cu e tabata djis na soño.  El a wordo lanta y aki ta unda cu Polisnan a ripara cu e ta papia cu lenga pisa, su wowonan ta basta cora, y casi e no por para drechi riba su pianan.  El a bay di acuerdo pa haci test di supla, pero e aparato di Alco Sensor IV a indica cu el a sobrepasa e limite legal.  Pues e ta pata-pata!  Mesora a detene pasobra a viola Articulo 5 inciso 2 di Ley di Trafico.

   Un Ambulance mas a yega na e lugar, y asina Paramediconan por a sigui check e chauffeur burachi aki, y otronan por a check e dos damanan cu tabata den e Chevrolet Spark, pero a nota nada serio.  Debi cu e chauffeur burachi a haya basta golpi, Ambulance a bay cune pa Servicio di Emergencia na Hospital.