Chauffeur a scapa milagrosamente di accidente pisa cu truck

Riba Avenida Nelson Oduber

• Comerciante Francis Saladin Sr. hiba pa Hospital 

ORANJESTAD (AAN): Diabierna atardi poco despues di 3:50 pm, tanto Centro di Alarma 911 y tambe Central di Polis a cuminza ricibi yamada di un accidente pisa riba Avenida Nelson Oduber, na altura di King Plaza cu ta situa poco panort di Taco Bell Sasaki.

   Central di Polis inmediatamente a cuminza manda unidadnan di Polis, pa yuda den e accident.  Centro di Alarma a saca Ambulance rumbo pa e lugar, y como cu tabatin indicacion cu lo tin hende pega den vehiculo, a manda Vehiculo di Rescate di Bomberonan tambe.

   Unidadnan di Polis a yega, y a bin haya un escena dramatico, cu piezanan di auto gespat tur caminda, y un SUV color blauw scur tur kibra y habri, comosifuera ta un cortado di hero a pasa door di dje.  Piezanan di e vehiculo aki a keda tur plama tanto riba acera como riba caminda.

   E vehiculo aki ta un Hyundai Santa Fe color blauw scur cu number A-52147, y tin un adulto mayor tras di stuur y e ta mustra di ta den grave dolor.

   Tabata bisto cu e Hyundai Santa Fe aki a dal fuertemente contra un Isuzu Box Truck Delivery grandi color blanco cu number DT-48, cu ta di agencia Caribbean Overseas.

   Fotografo a papia cu chauffeur di e Isuzu Truck, y el a splica cu el a subi e caminda principal for di e salida cerca di King Plaza.  El a declara cu el mira e vehiculo Hyundai Santa Fe ta biniendo di zuid for di e Rotonde, pero segun su declaracion, e no tabata sa cu e vehiculo aki tabata biniendo riba un velocidad hopi halto.

   A ripara cu e Hyundai Santa Fe a bay maniobra pa trata di no dal patras di e Isuzu Truck cu a aparece su dilanti, pero e poco distancia a pone cu no por a haci mucho y el a dal contra e Truck parti robes.

   Den e impacto fuerte aki, e Hyundai Santa Fe a draai rond y zwaai pieza pa tur caminda,  den esaki a dal un tiki den un Toyota Hiace transport van di Kini Kini Transfer & Tours cu number O-54m pues tambe a haya sla na banda robez mas patras.  E van a bay stop un tiki mas panort.

   A nota cu e Isuzu Truck a manera ricibi golpi fuerte na e axle patras, y e vehiculo a keda di banda despues di impacto.

   Victima keda pega: Varios persona cu a mira e accident socede, a stop y a core bay check e persona den e Hyundai Santa Fe.  Tabatin e chauffeur solamente, y el a resulta di ta e conocido comerciante, Francis Saladin Sr., esta e tata.

   En total dos unidad di Ambulance a yega, y a cuminsa check señalnan vital di e victima.  A logra sak’e di e vehiculo, y e tabata keto bay na tino pero visiblemente cu dolor.  El a wordo poni den Ambulance, y hiba na Hospital cu ta djis par di minuut leu.

   Mirando e daño material na e Hyundai Santa Fe, ta bisto cu mayoria golpi y sla tabata na banda drechi di e vehiculo.  E parti robez a haya menos, y pesey e chauffeur no tabata den situacion mas pisa.  E storia lo por ta hopi diferente, si acaso e tabatin un pasahero sinta na banda drechi.

   E caminda a keda cera pa asina Polis haci investigacion, y despues