Caso espantoso di Drive-by Shooting na Sabana Basora

Diabierna anochi no tabatin trankilidad

ORANJESTAD (AAN): E tabata un anochi basta trankil, como cu den dia tabatin basta awacero y anochi porfin a yega momento pa ta keto.

   Sinembargo, Diabierna anochi poco despues di 8:00 pm, e trankilidad di un sector na Sabana Basora a wordo interumpi, ora cu diripiente hendenan a tende tiro den un di e cayanan cu tin eynan.  Mesora yamadanan a cuminsa drenta na Polis, pa raporta cu net dilanti Sabana Basora 157-A a socede un ‘Drive-by Shooting’.  Esta cu un hende a pasa y los tiro.

   E cas aki ta situa como 207 meter Noordoost (patras) di e Supermarket grandi cu tin eynan.

   Mesora Central di Polis a manda unidadnan di Polis di San Nicolas, y tambe diferente unidad di Polis di Playa rumbo pa eynan.  Unidadnan di Recherche y Unidad bon arma (Special Team di Polis) tambe a yega den e area.  Unidadnan di Polis K-9 a yega pa duna un man.

   Montin di Polis: Polisnan a core seya e lugar, y a cuminsa busca informacion.  Otro oficialnan a cuminsa “sefta” e area visualmente enbusca di cualkier huls di municion benta abao.

   Na e cas, a bin nota cu tin prueba di impacto di bala.  Pues a manda busca Team Forensico di BFTO tambe pa bay documenta tur esaki.  Esnan na e cas aparentemente a reconoce e auto cu a pasa dilanti e cas, for di cual a los un serie di tiro riba e cas.  Polisnan a bin ricibi suficiente informe, y tur esaki a wordo pasa tambe na autoridadnan hudicial cu awor ta buscando e auto, y tambe e persona cu a comete e acto peligroso di los tiro.

   Polisnan a sigui enfoca nan buskeda den e parti zuid di Sabana Basora, sigui bay te na e area di Pos Chiquito.

   Nan sa caba ken e ta: Despues a haya informe, cu den pida mondi den e sector, a mira e persona sospechoso, esta esun cu a los tiro.  Pero ora cu el a mira autoridad, el a core drenta un auto y a huy di e zona.

   Autoridadnan a keda ta busca rond pa tur sorto di prueba henter Diabierna anochi, y sigur tabata sinti falta di e Helicopter di Polis pa a yuda.  Pero nan tin a lo menos indicacion ta kende e sospechoso aki ta, pues lo no dura hopi prome cu autoridad hudicial bin bati na su porta.

   Den pasado tabatin otro casonan similar di Drive-by Shooting den areanan aki di Sabana Basora y tambe Pos Chiquito, y specialmente team di Recherche San Nicolas a haci un fenomenal trabao pa haci investigacion pa asina finalmente drenta accion y detene e personanan aki.

   Hopi biaha ta hobennan cu ta comete e actonan aki, sin pensa mas leu cu nan nanishi ta cuanto problema nan ta hinca nan mes aden, y cu lo por bay keda encarcela pa basta tempo y perde tur nan libertad.

   Polis awor ta pidi cualkier persona cu por a mira algo, of sa di loke a socede Diabierna anochi, pa por fabor yama y duna tip na autoridad.  Corda cu bo anonimidad ta keda garantiza, si bo yama Tipline di Polis na 111-41.  Ban yuda stop crimen na Aruba.