Candela den negoshi den Caya Grandi na centro di ciudad

“Polo Club” na candela

• Autoridad a bay cu maximo alerta
• Profesionalismo di Bomberonan a sobresali 

ORANJESTAD (AAN): Diamars atardi alarma a worde bati pa un tienda na candela den centro di ciudad, den Caya Betico Croes.

   Mesora polis y ambulance a mobilisa pa e sitio y a bin ripara cu huma tabata saliendo for di e tienda Polo Club, situa un tiki pariba di Ex-Aruba Trading Company den Caya Principal.

   Un unidad di Brandweer a drenta den caya, unda cu mesora bomberonan a drenta pa inspecciona di unda tur e huma ta biniendo.

  Dado momento nan a sali back, y a bay pasa patras di e edificio pa por drenta di banda ey.

   Na e sitio nos por a tende algun empleado bisa cu e candela a cuminsa den e warehouse y a expande rapidamente. Ey ta unda cu nan a bati alarma mesora.

  E temor tabata pa e candela no bay over na e tiendanan den banda y bira manera un La Linda. Pero bomberonan bou supervision di local y algun Hulandes a sa di domina e candela.

   A usa aparatonan special pa chupa e huma di e establecimento, tambe a controla e piso ariba y edificio na banda.  E huma tabata hopi diki y a afecta por lo menos un Bombero eynan, pero el a keda OK.

   A admira e profesionalismo di Bomberonan cu a sa di usa tactica y experticio pa asina logra domina e candela aki, y evita cu e ta bira algo hopi mas grave y doloroso pa comercio en general.  Pa awor e negoshi ta cera y investigacion lo sigui pa asina check e causa, y tambe e daño ocasiona door di awa y huma.