Accident grave na Savaneta a ranca bida di motociclista

Situacion cruel Diadomingo anochi

• Victima di 56 aña naci na Hulanda a perde su bida
• Victima a keda decapita den e accident 

ORANJESTAD (AAN): Fin di siman tabata bayendo relativamente basta trankilo pa autoridad local, y tambe pa seguridad den trafico.  Sinembargo esaki a cambia completamente alrededor di 7:45 pm, yamadanan a cuminza drenta tras di otro na Central di Polis.

   E informe ta cu riba caminda principal di San Nicolas pa Oranjestad, na altura di Savaneta 311-A, cu ta net na e Tweg pa bay zuid rumbo pa Piscina Olimpico Roly Bisslik, un accident fuerte a caba di socede.  E desordo tabata enorme y hendenan a mira cu ta un accident grave.

   Inmediatamente Central di Polis a dirigi patruyanan di San Nicolas pa mobiliza pa eynan, y a contact personal di Departamento di Trafico tambe, y pone Centro di Alarma na altura pa manda Ambulance.

   E prome unidad Policial cu a yega, a bin topa cu un bista masha cruel mes eynan.  Ta trata aki di un accident entre un Pickup Double-Cab color shinishi, un auto compacto Honda Fit blanco, y un motorcycle marca Triumph di fabricacion ingles.

  Curpa sin cabez: Abao a bin topa cu e manehador di e motorcycle benta mey-mey di e Honda Fit y e motorcycle.  Pero e curpa tabata decapita, y e cabes di e manehador mes, cu e helm ariba riba cabes, a finaliza abao dilanti e motorcycle.

   A nota cu e Pickup Double-Cab a para direccion zuid riba e parti di e T-weg cu ta bay pa Piscina Olimpico.

   Inmediatamente e patruya a notifica Central di Polis, di e situacion y a pidi pa manda tur autoridad maximo eynan, incluyendo Specialista di Trafico, y a pidi pa cera e caya hermeticamente mirando e situacion cruel eynan.

   Ambulance a yega un rato despues eynan, y e Paramediconan a ripara mesora cu e manehador di e motorcycle no ta na bida mas, y a dicidi na habri paña blauw riba e curpa, y a pone pida paña blauw riba e helm cu e cabes tambe.

   Team forensico di BFTO tambe a yega pa saca potret y tuma midimento, y a nota presencia di Altocomisario Arnhem tambe.

   Hipotesis di e caso: Tanto e Honda Fit blanco, y e Pickup Double-Cab tabata moviendo di San Nicolas direccion Oranjestad (bayendo pabao).  Pa prensa no a sali hopi na cla di unda e Motorcycle ta biniendo.  Pero vocero di Polis a duna un hint cu e Pickup a bay bira na su man robez pa drenta e T-weg.

   Loke a socede realmente no a wordo divulga.  Pero e pensamento ta cu e cambio di direccion di e Pickup lo por a pone e motorcycle bay dal den dje, of e motorcycle a bay dal den e Honda Fit.  Kico exactamente Polis no a bisa, pero Departamento di Trafico lo sa di haci e analisis y bin cu nan rapport final.

   Na prome instante, Polis no kier a divulga nomber di e victima te despues cu e famia a wordo notifica.

   Vocero Policial Liliana Rasmijn a indica cu Bureau Slachtofferhulp tabatey, hunto cu Fiscal, Specialista di Trafico, Hefe di Trafico tambe.

   Trahador di Hospital: Despues un unidad di Polis a bay na e cas di famia pa notifica nan di e sucedido.  Casi 10:30 pm, e ora Liliana Rasmijn oficialmente a informa, cu Docter a constata morto di e motociclista Dennis Leonel C. Vakkers, naci dia 18 di November 1968 na Hulanda, pues e tin 56 aña di edad.  E ta labora na Dr. Horacio Oduber Hospital, y ta hopi activo cu gruponan local di Bikers.

   Dennis Vakkers a bira pues e prome victima cu ta perde su bida den trafico 2025 na Aruba.

   Algun observador a conta cu algun aña atras na e mesun area aki a socede un accidente di auto tambe fatal y den e accidente ey un persona a wordo decapita.  Su cabes mes a bula y bay cay pazuid di caminda den cura di un cas.

   Den decada di 1980 tambe, como 300 meter mas pabao tambe tabatin un accident riba e caminda ey den oranan di anochi, y e victima fatal a perde full su bil y pia di e accident ey.  E tempo ey esaki a ocasiona hopi consternacion na Aruba.

   Na famia y amigonan di e fayecido, DIARIO como tambe Cuerpo Policial ta extende su mas profundo palabra di condolencia.  Polis a indica cu e caso ta bao investigacion.