Candela a plama rapido y destrui cas di famia Rasmijn den centro di Santa Cruz

Pareha di edad a perde tur cos

• Evacuacion di señora kende recien a haci operacion grandi
• Posibilidad cu resto di klapchi a bin cay den veranda 

ORANJESTAD (AAN): Diferente persona alrededor di 10:15 pm riba Diahuebs anochi, a cuminsa yama tanto Polis como tambe 911 Centro di Alarma, pa raporta cu tin un candela grandi a cuminsa na cas di e conocido Archie Rasmijn, cu ta situa como 45 meter net pabao di rotonde di Santa Cruz.

   Inmediatamente unidadnan di Polis di Santa Cruz a wordo manda, y unidadnan di Bombero a cuminsa sali rumbo pa e adres Santa Cruz 50, cu ta situa net pabao di Botica Maria, y net pariba di antes e prome adres di Rowigini’s.

   E prome unidad di Polis cu a yega, a bin nota cu ta trata aki di un ‘uitslaande brand’, y cu vlamnan grandi ta saliendo for di e cas aki cu tin un grandura di como 165 m² riba un tereno cu ta completamente rondona pa vegetacion.

   Evacuacion dificil: Na e cas di Archie Rasmijn, ta djis dos pareha di edad ta biba.  Polis tabata alivia pa mira cu ambos ya a logra sali di e cas, y ta sano y salvo.  Mesora nan a indica na autoridad cu e candela parce di a start den veranda, y di eynan a expande rapido den nan hogar.  Archie mes a sinti holor di huma, y ora cu el a sali di camber, el a mira vlamnan den veranda.  El a dicidi gara su pareha y pa evacua di e cas sin chens di pasa man pa nada.

   E evacuacion di e dama a bay tiki dificil, como cu recien el a caba di haci un operacion grandi na Hospital, y ainda e tin algun pieza medico conecta na su curpa ey na cas.  Pues cu masha cautela mester a sali cune.  Bon mes cu un testigo cu a mira e candela, a core baha y drenta e tereno y a yega tambe te na porta di e cas, y manera un heroe el a core duna asistencia y a yuda e dama y tambe Archie sali di e cas.

   Busca ambulans tambe:     Polisnan a cera e pida caminda aki for di rotonde Santa Cruz bay te na e T-weg cerca di Colegio San Antonio MAVO mas pabao.  Personal di NV Elmar a presenta pa kita coriente di cas, pa evita situacion indesea ora di paga candela.

   E dos unidadnan di Bombero cu a yega eynan, mesora a drenta accion y alavez a solicita pa ambulance, mirando e cu e pareha tabata hopi emociona, y posiblemente te hasta por a inhala huma y considerando e hecho cu el a caba di haci operacion grandi..  Centro di Alarma a despacha dos Ambulance tambe eynan pa atende cu e pareha y despues paramediconan a indica cu mihor nan sali cu nan pa Hospitaal.

   Polis a pone Bureau Slachtofferhulp tambe na altura pa yuda e pareha cu tur logistica, mirando e hecho cu den fraccion di minuut nan a perde tur loke nan tabatin, apenas 3 dia prome cu fin di 2023.

   Hipotesis di e candela: Bomberonan a sa di usa tactica pa asina domina e candela, y despues tin tarea pa trata na haya sa e origen di e causa di e candela cu a laga pareha Rasmijn y Zievinger sin lugar pa biba.

   Archie mes a bisa cu el a djis haya holo di huma, y e no a tende nada di explosion.  Pasobra hopi hende a pensa mesora cu ta klapchi a wordo tira den e veranda di su cas.

   Sinembargo e hecho cu Archie no a tende ningun klapchi explota hopi cerca, y a djis haya holor di huma lo por ta indicacion cu kizas ta un vuurpijl cu a wordo tira den e area ey di Santa Cruz, finalmente ora di caba di explota den cielo, lo a bin abao y cu biento a bay finalisa te den e veranda.  Aki e resto di vuurpijl a keda kima, y lo por a start e candela.

   Pasobra como cu Archie no a tende algo explota, esey kiermeen cu no tin hende cu lo a pasa ey dilanti y tira un Thunder King of algo potente den veranda cu e ora a kima e cas.  Bomberonan lo bay analisa tur e resto cu nan topa cune den e cas pa e investigacion.