Minister Arthur Dowers ta admiti:
ORANJESTAD (AAN) -- Den entrevista cu Matutino DIARIO, Minister di Husticia Arthur Dowers, a wordo puntra ta kico ta pasando cu tanto arma circulando riba nos Isla?. Acaso e campaña di e dos bakinan blauw cu a ser poni pa hende entrega arma, di forma anonimo, no a yuda?
Minister Dowers a admiti cu e dos bakinan blauw, cu a costa cien mil florin cada un, no a yuda y nunca lo yuda y gobierno ta sa esey di antemano y lo no ta bay yuda tampoco.
E dignatario a señala cu KPA den su personal tin 80 polis menos di loke tabata tin ora el a bay for di Cuerpo Policial. “Den pasado nos a traha hopi duro, y mesun situacion nos a topa ora nos a bin na 2009, a trece casi 200 polis pa Cuerpo, y el a bin bek haya 80 menos den e organizacion y esey ta nifica cu nos mannan ta mara. Pues cu tur e cosnan cu nos tin y mi por cuminza cu e cosnan di mas leuk. Na cuminzamento di fin di aña, December, Pasco; Carnaval ta cuminza, polis ta ocupa; despues ta sigui campamento bay festival y tur e fiestanan cu tin, polis ta ocupa, y polis ta ocupa cu crimen, cu hende cu ta bati e casa, cu hende cu ta bringa, etc., etc.
Kiermen, ta hopi trabao y nos tin cu gewoon admiti, nos ta trahando duro aworaki pa wak y ta spera cu e luna aki of cuminzamento di otro luna, nos por manda 25 polis nobo riba caminda, pero esey ta nifica toch cu ta un druppel y nos tin cu zorg pa mas polis”, Minister Dowers a declara.
El a agrega cu e parti di voorlichting ta importante, y e parti preventivo.
“Y e parti preventivo manera por mira polis ta actuando. Ayera anochi mes tabata tin control riba caminda, nan ta critica cu nos ta molestia riba trafico, pero nos ta gara hopi vez den e control di trafico, hende cu arma of cosnan ilicito y esey ta un di e formanan facil, pero for di afo tambe, cu nos por yega na preveni cu cosnan ta pasa y di otro banda na momento cu bo haya intuicion basa riba bo inteligencia y informacion, bo ta dirigi hunto cu Ministerio Publico, riba hendenan cu ta haci nos pais insigur”, Minister di Husticia Arthur Dowers a señala.
