Varios adulto mayor a trompica cay abao na suela
- Recherche y Polis a actua rapido y detene total 5 persona
ORANJESTAD (AAN): Ora cu Polis y autoridad hudicial a haya sa cu na San Nicolas a start cu un ‘trend’ nobo unda algun persona anti-social tabata pasa pusha y pone adultonan mayor trompica, djis pa nan por probecha cu nan ta benta eybao cu dolor, pa kita nan tas, cartera, of smartphone di nan, y core desaparece.
Esaki a pone cu autoridadnan hudicial a start mesora, y awor cu a bin gara e delincuentenan aki, a bin descubri cu ta trata di algun chabalito tabata haci esaki.
Vocero Liliana Rasmijn di Cuerpo Policial a confirma cu e team di Recherche di San Nicolas a traha incansablemente pa e diferente casonan di robo riba adulto mayornan na San Nicolas.
E sospechosonan tabata pusha e adulto mayornan den un forma pisa cu e adulto mayor ta cay of ta keda indefenso. Den e momento aki, e sospechosonan menor di edad tabata probecha pa horta nan pertenencianan, y bay laga e personanan benta eybao.
Den un forma relampago, bon coordina cu conocimento den e materia di investigacion, Recherche di San Nicolas conhuntamente cu Cuerpo Policial Aruba por informa ciudadanonan di Aruba, cu nan a logra detene te cu awor 4 sospechoso relaciona cu e caso aki.
Lamentablemente Polis a keda babuca, pa nota cu e delincuentenan aki, ta trata di 3 menor di edad y un adulto, kende tambe a comete asaltonan contra nos adulto mayornan.
Vocero di Polis a bisa cu ta trata di e sospechosonan di inicialnan T.J.G.B. di 15 aña naci na Aruba, tambe J.D.J.T. di 16 aña naci na Aruba, tambe E.J.E.K. di 16 aña naci na Aruba. E adulto ta G.V.F. di 31 aña naci na Aruba.
Recherche di San Nicolas no a para keto y den mesun rosea a detene e sospechoso K.J.A.S. naci na Aruba di 40 aña di edad pero esaki ta relaciona cu casonan di ladronicia riba diferente casnan na unda mayoria ta adulto mayor ta residencia.
No ta descarta cu den e dianan nos dilanti recherche lo haci mas detencion pa cu e caso menciona.
Cuerpo Policial Aruba ta keda haci un suplica na cualkier persona cu sa algo of a wak algo pa yama e tipline di Polis cu ta 111-41. Bo ta keda 100% anonimo.
