Otro motociclista a bira victima
ORANJESTAD (AAN): Tabata siman pasa cu DIARIO a publica algo similar caba! Esta cu un motorcycle coriendo for di rotonde Mahuma pasando den Santa Marta pa yega Sero Biento pa bay na The New Well Well Bar & Restaurant, diripiente a sinti dolor inmenso na su lomba.
A resulta cu ta un proyectil di bala a bin pega den su lomba. Awor ta saliendo na cla cu tin mas motociclista cu ta birando victima di esaki.
Den pueblo por a tende recien cu kizas ta un habitante fada di brommernan coriendo ta revv motor duro den bario, cu lo a fada algun ciudadano, y ta tumando ley den nan mesun man. Si esey ta corecto, lo tin di wordo investiga door di Recherche.
Pero pa Cuerpo Policial e caso aki ta serio! Diahuebs merdia, vocero Liliana Rasmijn di KPA a confirma na DIARIO, cu nan ta investigando e caso ey, fuera uno nobo cu a bolbe socede riba Diaranson anochi.
E prome caso cu DIARIO a referi na dje, a socede Diadomingo marduga dia 20 di September 2026. E di dos caso a socede Diaranson anochi dia 30 di September 2026.
Mik y tira riba Brommer: Segun vocero, Polis ta investigando e caso serio nobo aki unda un persona (of personanan) a mik un arma y tira riba un motociclista cu tabata coriendo riba caminda di Sero Biento.
Tabata Diaranson nochi, cu e motociclista coriendo door di Sero Biento a sinti un dolor na su lomba. Ora el a yega cas na Paradera, el a nota cu tabatin un bala pega den su rugbrace. E motociclista masculino a core bati alarma na Central di Polis. Mesora un patruya di polis, como tambe Recherche y team forensico di BFTO a bay na su cas na Paradera.
Departamento di Recherche ta na altura cu tin algun caso cu ta envolvi tiramento na altura di Seroe Biento y ta investigando rigurosamente.
Polis ta haci un suplica apelacion na cualkier persona cu sa algo of cu a mira algo sospechoso pa yama e tiplijn di polis na 111-41. Bo ta keda anonimo.
No ta descarta cu den e dianan dilanti cu detencionnan lo cay.
