Dos detencion pa asesinato na Zeewijk
ORANJESTAD (AAN): Den edicion di Diamars mainta, DIARIO a mustra cu tin testigonan cu a mira e victima Frans Angela sali Diahuebs anochi cu dos hende. Esaki a pone famia haya e teoria, cu ta un crimen a wordo cometi contra nan ser keri.
Francisco Angela a wordo haya Diabierna 18 di Maart den oranan di mainta, benta na un forma raro abao net otro banda di caminda di e Santana Catolico na Zeewijk. Mientras tanto Recherche a traha meticulosamente, y riba Diamars atardi a anuncia cu nan a pone man riba dos hende.
Recherche via di vocero policial, a confirma dos detencion pa asesinato na Zeewijk.
En conexion cu e caso di asesinato cu a tuma lugar dia 18 maart 2022 Recherche di San Nicolas (DAR-3) a detene un homber di inicial J.N.C.B. di 22 aña naci na Aruba. Tambe a detene e muher W.A.W. di 33 aña naci na Republica Dominicana.
Bao guia di Fiscal y a acompania pa Huez Comisario, Recherche y Polis a tene un razzia na un cas na Cura Cabay Zuid y a detene e dos sospechoso menciona.
Den e cas a confisca algun articulonan cu probablemente por worde uza como evidencia contra e dos sospechosonan.
Pa Cuerpo Policial por resolve mas caso cooperacion y informacion di pueblo di Aruba ta hopi importante, pesey nos ta pidi si bo tin cualkier informacion yama nan tipline: 111-41. Nan ta garantisa cu bo ta keda anonimo.
