Boto a bolter cu 4 homber algun miya pabou di Boca Catalina

Rescate Diasabra anochi cerca di Aruba

ORANJESTAD (AAN): Tabata Diasabra atardi pa anochi, e informacion a drenta localmente cu un lama bruto a pone un boto bolter algun miya pabao di Boca Catalina na Aruba.  Mesora Central di Polis a core activa e draaiboek di accion pa casonan asina.

   Uno di nan ta pa comunica cu Centro MOC di Wardacosta di Caribe Hulandes, y informa nan di e alarma cu un boto a bolter cu 4 persona abordo den area pabao di Arashi y Boca Catalina.

   Centro MOC mesora a dirigi nan avion Dash-8 di patruyahe pa bay bula riba e area, pa asina localiza nan.  Tambe a saca un speedboat di Wardacosta tipo Metal Shark cu a cuminza bay west di Aruba.  E avion Dash-8 ta esun cu rapidamente a localiza e boto cu a kapseis y mesora a duna e coordinadonan na esnan di Metal Shark, pa yega mas rapido pa brinda asistencia na e hendenan.

   For di tera tambe tabatin hendenan ta observando loke ta pasando den e anochi scur ey.  Den scuridad leu esnan pasando ariba caminda por mir e luz blauw di e Metal Shark, pues unda e sucedido a tuma luga.  Famia y amigonan di esnan den e boto a yega na Centro di Pesca Hadicurari pa asina nan bay riba e Pier sperando yegada di Wardacosta.

   Mientras tanto riba lama, e Metal Shark a yega na e lugar di incidente, y a topa un boto di bolter cu cuater persona cu tabata tene na e boto. Agentenan di Wardacosta a duna cada uno salbabida, y despues tuma e cuater hombernan local abordo di e Metal Shark. Despues Wardacosta a hiba e personanan safe na Hadicurari. E personanan a pasa den un susto, pero nan a yega bek tera sano y salvo.

   Unavez cu a yega na Pier di Hadicurari, famianan emociona a ricibi nan ser keri, y tabatin sopi cayente pa nan bebe.  Tambe tabatey Paramediconan di un unidad di Ambulance cu a yega pa asina ta cla pa check cada uno, y presta asistencia medico si tabata necesario.

   Kico a pone cu e boto a bolter?  Loke por a compronde di e naufragonan, ta cu e cabuya di e anker a bay pega den motor, causando cu esaki a bolter.  E bon noticia na final ta cu nan tur a yega tera bon.