Bombero mester a corta auto pa yuda saca dama herida na Paradera

Boksmento cu 4 vehiculo envolvi

ORANJESTAD (AAN): Diaranson mainta alrededor di 10:00 am, trafico di Tanki Leendert yegando e rotonde di Paradera tabata tiki stagna y cu un rij largo.

   Como 160 meter pabao di e rotonde aki, chauffeur di un Toyota 4Runner color preto cu number A-1111 bayendo pariba, no a ripara cu e trafico su dilanti a slow down.  Pues el a bay dal basta duro den un Hyundai Accent color shinishi cu number A-53959 cu tabata su dilanti y tambe bayendo pariba.

   E momentum inespera di e impacto, a causa cu e Hyundai Accent a wordo pusha dilanti y bay den su man robez, net ora trafico ta bin di otro banda.  E Hyundai a bay dal fuertemente den wantalodo y porta di un Kia Rio color berde scur cu number A-74070 cu e momento ey ta acelerando bayendo direccion pabao.

   Na mesun momento, un Kia Sportage color maron di number A-25753 cu tambe ta bayendo pariba a haye cu sorpresa inespera cu e Toyota 4Runner a stop abrupto su dilanti.  Aunke el a purba hala na su man drechi, toch el a pega mitar di su front tras di e SUV preto su dilanti.

   Un dama sinta na banda den e Kia Sportage a ricibi golpi na su man y tambe a sinti dolor na su nek.   E dama tras di stuur di e Kia Rio a haya golpi na man tambe, y tiki quemadura leve na su cara ora cu e airbag a activa.  Sinembargo debi na e deuk fuerte na su porta, esaki no por a habri.

   Yamadanan a cuminza drenta na Polis pa mustra cu e accident fuerte aki a caba di socede net dilanti AutoMAXX.  Inmediatamente diferente unidad di Polis di Santa Cruz y tambe di Playa a yega eynan, y a yuda cera e caminda.  Dos unidad di Ambulans, y tambe dos Rapid-Responder a yega pa duna un man.

   Sinembargo ora a mira cu e Kia Rio su porta no ta habri, a pidi Centro di Alarma pa manda Vehiculo di Rescate, cu a sali for di Kazerne di Brandweer na Aeropuerto pa duna un man.

   Despues di a corta e porta, e dama di e Kia Rio por a sali y el a wordo hiba pa Hospital pa un chekeo medico.  E dama di e Kia Sportage tambe a ser hiba pa un control.