Boksmento frontal na Noord a laga dos persona herida

ORANJESTAD (AAN):  Diasabra atardi banda di 5:30 PM, un accidente basta pisa a sosode na Noord, den cercania di Silvesterstraat - Caya Calco.

            Polis y ambulans a reacciona rapido y a dirigi nan mes poco mas pariba di Del Rey Apartments, unda nan a topa cu un accidente frontal entre dos vehiculo.

            Tres ambulans a presenta na e sitio pa atende esnan herida, un dama y un cabayero cu a wordo afecta serio durante e colision entre nan Nissan Versa y Nissan Sentra.

            Segun informacion inicial, e Nissan Versa tabata bayendo na un bocht y a bay mucho na man robes, resultando na un colision frontal cu e Nissan Sentra. E impacto a causa daño considerabel na ambos vehiculo y a resulta den heridanan pa e ocupantenan.

            Polis a cera e caminda pa asina facilita nan trabou, mientras a warda pa departamento di trafico yega pa cuminsa cu nan investigacion pa determina e causa exacto di e accidente.

            E heridonan a wordo transporta inmediatamente pa Hospital pa recibi tratamento medico adecua. Nan condicion actual ainda no ta conoci.

            Lo ta un tarea di importancia pa esnan encarga cu e investigacion pa traha un comprondemento completo di loke a sosode.