Autoridad local a intercepta cargamento grandi di droga destina pa Hulanda

Seis persona deteni riba Diabierna

• Cocaina tin un peso total di 140 kilo balora na 10,5 miyon Euro
• Colombiano, Venezolano, Dominicano y Arubiano envolvi 

ORANJESTAD (AAN): E investigacion ta andando di algun tempo caba, y esaki ta inclui vigilancia, posiblemente intercepta yamada, y sigui movimento di un grupo local cu ta preparando un posible “transshipment” di droga fuerte, pa wordo manda pa exterior.

   E investigacion tabata uno di hopi pasenshi, pero e asina yama Unit Narcotica di Cuerpo Policial a sa di sigui e proceso, y agrega acerca logistica y experiencia di e oficialnan ‘bakia’ den nan trabao.

   Vocero Policial Lito Lacle a confirma cu for di algun tempo caba Unit Narcotica a traha incansabelmente riba un caso grandi di exportacion di droga for di Aruba cu destinacion Hulanda. 

   Trahando den ekipo cu bon harmonia y sincronisacion, Unit Narcotica conhuntamente cu Douane Recherche a detecta un cargamento grandi di mas cu 140 kilo di Cocaina saliendo scondi abordo di un container rumbo pa Hulanda.

   Cu hopi strategia, investigacion y cu cautela, riba Diabierna e oficialnan aki hunto cu Team di Aresto, Ministerio Publico, y Polis a haci diferente razzia na adresnan rond di Aruba.

   Vocero Lacle a bisa cu danki na e entradanan hudicial aki rond Aruba cu a conduci na detencionnan.

   A detene e hende hombernan di inicial Y.M.T. di 45 aña naci na Colombia.  Tambe a detene E.R.F. di 63 aña naci na Venezuela.  Otro detencion ta J.A.C di 52 aña naci na Republica Dominicana.  Tambe a detene e homber R.M.Z. di 40 aña naci na Aruba.

   Tambe a detene e muhernan di inicial G.L.C. di 31 aña naci na Venezuela, y e muher V.A.R. di 57 aña naci na Aruba.

   Durante e entrada Hudicial a confisca diferente articulonan manera placa, smartphone, auto, droga y documentonan.

   E droga aki di 140 kilo di cocaina, riba caya na Europa tin un balor di 10,5 miyon Euro.  Vocero Lacle a bisa cu nO ta descarta cu por tin mas detencion den e caso aki.

   E potretnan aki ta pa cortesia di Unit Narcotica di Cuerpo Policial.