Auto compacto a kima riba Diadomingo mainta na Nuñe

ORANJESTAD (AAN): Tabata Diadomingo mainta trempan, cu tanto un unidad di Polis y tambe un spuit di Brandweer a sali di emergencia pa un area di Nuñe. 

Esey ta debi cu algun yamada a drenta cu tin un auto na candela.

   Tur cos a socede alrededor di 8:00 am, cu un ciudadano a mira candela saliendo di un auto dilanti un cas, y mesora e tabata e prome cu a bati alarma.

   Bomberonan na yegada a paga e candela cu tabata na e parti dilanti di un auto compacto hatchback Nissan Note color cora cu number A-79532.

   Informacion cu a haya sa na e lugar, ta cu posiblemente a laga e auto cendi pa basta rato y pa un motibo of otro kizas e por a causa cu e auto a cende candela.  Gran parti cu a kima ta e parti dilanti unda e motor ta, y tambe parti interior a ricibi daño extenso. Polisnan a tuma datonan di e incidente.