Auto a ranca palo di luz y despues causa mas destruccion den Caya Betico Croes

Chauffeur deteni pasobra ta burachi

ORANJESTAD (AAN): Diasabra merdia banda di 2:00 pm, Central di Polis a manda unidad di Polis di Playa rumbo pa Caya Betico Croes, como cu un tiki pariba di e rotonde di Verbindingsweg y Verlenging De La Sallestraat, un accident a keda registra.

   Ora cu Polis a yega den Caya Betico Croes, riba e acera net dilanti cas Caya Betico Croes 167 panort di caminda, a bin haya un sedan BMW 320i color blanco cu number A-15989 color silver basta kibra dilanti y na banda.  Aki dilanti e cas el a ‘touch’ cu e palo di coriente.

   Ora di hisa cara y mira mas pariba, como 40 meter a nota cu e sedan aki a ranca y kibra un palo di luz completo.

   E accident mes: A bin sali na cla cu e chauffeur coriendo basta duro, a dal prome den e palo di luz ey, kibr’e, y despues su BMW a bay den scual y a sigui bay pabao, y finalisa ta dal contra pilar di e porta principal, dal tambe den e cura di cas, destrui un meter di awa di WEB Aruba NV, y despues dal cu e 2ndo palo di luz dilanti e cas number 167.  Esaki a djis haya un ‘deuk’.

   Polis a papia cu e chauffeur, y el a bin cu e storia cu un otro vehiculo a subi su dilanti, y pesey el a reacciona asina.

   E impacto den palo di luz aki a pone cu e sector aki a keda sin coriente.  Debi na e impacto fuerte, e airbagnan dilanti, y e impacto di banda a pone side-airbags tambe sali.

   Polis a pone personal di NV Elmar na altura pa bin check e situacion, pone un palo di luz nobo, y rek wayanan di nobo den e area.

   Debi na wayanan colga abao, y cu NV Elmar tin di bay drecha e situacion, Polisnan a cera e caminda net banda e cruzada cu Neptunestraat y tambe net banda di Corporate Impact Ministries Aruba.

   Ora cu Polis a sigui papia cu e chauffeur, a bin nota cu e persona aki ta mustra di ta bao influencia di alcohol.  Esaki a realisa debi cu su aliento ta hole na alcohol fuerte di uso interno, y ta papia cu lenga pisa.  Ora cu a haci un test di supla, e resultado di e Alco Sensor IV a sali malisimo pe.  Pues mesora el a wordo deteni, y a ser transporta pa Warda di Polis, unda el a ser presenta dilanti Fiscal Auxiliar.

   Posiblemente debi cu e ta burachi, Aseguro lo no cubri gasto di e accident aki, y esaki ta un gasto cuantioso, mirando cu ta henter un palo di luz mester a wordo cambia, y tin di bay drecha cura di cas, pilar, y paga pa meter di WEB Aruba NV tambe.  Ainda falta tur e gasto di e auto cu a keda basta destrui.