ORANJESTAD (AAN): Diabierna marduga banda di 12:40 am, unidad di Polis di Noord
a stop un vehiculo Kia Sportage color shinishi den area di Sabana Liber. Ora cu a bay check cu e persona tras di stuur pa su rijbewijs, a resulta cu e no tin esaki.
Esaki ta un paso automatico pa e wordo deteni. Sinembargo Polis a haya holor di marihuana ta sali for di su Sportage. Ora cu a bay check, den e vehiculo a bin haya marihuana, como tambe puiro di cocaina puro, substancia cu ta parecido na Tusi, y tambe a haya monton di pildo di Ecstasy (XTC). A descubri un suma grandi di placa cash tambe.
Mesora a detene e homber pa violacion di Articulo 10 inciso 1, tambe Articulo 21 di Ley di Droga, y Articulonan 3 y 4 di Ley di Droga.
Nan a confisca e smartphone di e homber, y tambe e Kia Sportage, y tur droga y placa cash. Nan a wordo pasa pa Unit Narcotica cu awor ta sigui cu e investigacion. Yabinan di e auto tambe a wordo entrega na Unit Narcotica.
