Auto a kibra palo di luz y bolter varios biaha den Caya Betico Croes

ORANJESTAD (AAN): Polis a ricibi informacion riba Diasabra anochi, cu den Caya Betico Croes un poco pabao di rotonde di Tarabana, un auto a bolter.

   Mesora a manda patruya di Playa pa eynan.  Na yegada, dilanti di Caya Betico Croes 225 a bin haya cu un auto compacto Kia Picanto color blanco cu number A-42628 gekenter.  Testigonan a bisa cu e auto a caba di sali di rotonde, biniendo pabao, y ni 55 meter mas pabao el a baha di caminda na su banda drechi, dal den un palo di luz dilanti Caya Betico Croes 227, bolter varios biaha y finaliza como 15 meter mas pabao net banda di un Abri di warda bus.  Algun persona cu a core yega, a logra yuda pa e chauffeur a sali, y el a keda eybao sinta banda di e auto.

   E chauffeur masculino a keda herida, y Polis a solicita presencia di Ambulance.  E palo di luz a wordo ranca completamente na su troncon abao, y a keda colga djis na e wayanan existente.  Pero e area eybanda a perde coriente tambe.

   Personal di NV Elmar a yega pa asina prepara nan plan di accion, pa kita e palo di luz di voltahe abao, pa pone uno nobo.  Takelwagen na final a kita e auto di riba caminda.