Auto a bolter cu tres hoben aden riba WVB Boulevard

ORANJESTAD (AAN): Diabierna anochi den careda di 9’or, a manda Polis riba WVB Boulevard,

riba e caminda di rotonde Tanki Leendert pa paperclip rotonde di Sero Patrishi, como cu un auto a bolter.  E prome unidad a yega y topa meymey caminda, un Hyundai Accent color shinishi cu number A-42077 riba su dak, pafo di dje tres hoben cu ta mustra cu lo a caba di traha un caminda. Nan tabata mustra hopi spanta y alavez tambe "tristo" di loke a caba di sosode.

   Un testigo kende a para su auto mas leu di unda e accident a sosode, a cana yega cerca y a duna Polis su version di loke el a mira socede.  Parce cu primeramente un auto compacto Honda Fit a pasa prome cu velocidad hopi halto, y despues e Hyundai Accent tambe tabata biniendo, pero esaki a perde control.

   Ta keda na Polis pa investiga si e Honda y e Hyundai probablemente tabata pusta, y e chauffeur di e Hyundai Accent di cuatro porta, cu dos ocupante mas, a perde control dal contra e blokinan di e separador mey-mey di caminda.  Debi na velocidad halto, e auto a bay den scual, y a cuminza bolter y na final a keda cu tur cuatro wiel den halto.

   Ambulance a presenta pa haci un control, pero e hobennan a mustra cu nan ta OK y no mester di yudansa.  Pues Ambulance a retira.  E caminda a worde cera altura di rotonde cu Tanki Leendert cerca Cas Casuela bay pariba, evitando trafico bay pariba mirando cu e auto tabata meymey caminda benta.  Esaki a wordo kita cu Takelwagen.