Auto a keda full destrui despues di dal fuerte contra palo di kwihi

Impacto violento riba Avenida Nelson Oduber

 Chauffeur a wordo saca for di auto y benta abao 

ORANJESTAD (AAN):  Diadomingo anochi alrededor di 11:30 pm, Central di Polis a manda patruya cu urgencia riba Avenida Nelson Oduber, poco pazuid di-ex House of Cheng, unda cu un accidente serio a sosode.

   Polis cu a yega a bin topa cu un auto sedan completamente destrui, esta un sedan Volkswagen CC color preto cu number A-75499 completamente kibra dilanti, y tambe su dak banda robez tin un deuk.

   E vehiculo a destrui tabata para casi mey-mey di caminda, pero no tin hende aden.  Sinembargo como 20 meter mas panort, pabao di caminda riba e acera tabatin un persona masculino benta abao, cu hopi golpi na su cabez.

   E palonan di kwihi cu tin pabao di caminda tabata mustra comosifuera nan a caba di wordo ‘raspa’ violentamente.

   Polis ta investigando cu e hipotesis cu e Volkswagen CC aki tabata bayendo zuid cu velocidad halto, y aki pa motibo desconoci a bay den un scual, baha banda drechi di caminda, y dal fuerte contra e palonan di kwihi, hasta a kenter un rato y dal e dak tambe, y despues cay bey riba su cuatro wielnan y lastra poco pa finaliza mey-mey di caminda.

   Pero durante e impacto riba e palonan di kwihi, e chauffeur cu no tin seatbelt bisti, a wordo ‘catapulta’ for di e auto, y a bay cay cu su cabez fuertemente abao na suela.

   Cerca Polis a lanta e sospecho cu lo por tin mas hende kizas cu tambe a wordo saca violentamente for di auto, y mientras cu ta warda yegada di Ambulance, nan a cuminza ta listra den tur e matanan diki cu tin eynan na Bubali Plas.  Varios persona cu a keda stagna den trafico, incluyendo turista, a duna un man pa cuminza busca den e matanan pa mira si por tin mas victima.

   Paramediconan na nan yegada cu cautela a prepara e chauffeur di e Volkswagen, pasobra ta bisto cu el a haya multiple trauma na su cabez, y algun ta severo.  Nan a usa neck-brace pa wanta su garganta stabil, y asina a pone riba brancard pa transport’e pa Servicio di Emergencia na Hospital.

   E caminda di Avenida Nelson Oduber pa bay zuid a wordo full cera, pa asina por haci investigacion y na final kita e Volkswagen destrui di eynan.