ORANJESTAD (AAN): Diasabra marduga, un famia bibando den Victor Hugostraat den bario di Mon Plaisir na Playa,
a keda sorprendi ora cu un delincuente a drenta nan hogar y a comete un atraco.
E atracador masculino cu su cara full tapa, tabata papia un Papiamento cu acento curasoleño, y e no a ni preocupa cu ta hendenan di edad grandi ta biba eynan, cu un nieto. El a apunta un arma di candela den nan direccion, y asina a exigi pa haya placa.
A atracador aki ta bisti cu jacket color blauw cu blanco, y cu jeans.
Despues e atracador mes a rek man, y pasa bay cu un Laptop Computer marca HP Pavillion Gaming 15.6” FHD, cu NVIDIA GTX, di 12GB RAM y 512GB Harddrive, y su keyboard tin iluminacion berde.
Tambe a bay cu un headphone! E atracador despues a sali, y a bandona e den un SUV color maron.
Victor Hugostraat ta keda den e caya net panort di Madurostraat y Vondellaan.
Polis a pone Atraco Team na altura, y a cuminza cu un investigacion. Cualkier persona cu por a mira algo sospechoso marduga den e area, ta ser pidi pa yama Tipline di Polis na 111-41. Si acaso hendenan a ofrecebo un HP Laptop pa cumpra cu mesun specificacion aki, bo por yama Polis tambe duna tip.
