ORANJESTAD (AAN): Diahuebs marduga banda di 4:00 am, Central di Polis a dirigi un unidad di Polis di San Nicolas
rumbo pa Bongo Bar situa den Zeppenfeldtstraat debi cu tin un bringamento andando den e negoshi, entre un ‘gang di Village’ y cuatro persona. Polis a haya tip acerca, cu un di e personanan aki tin un arma di candela cune.
Pero ora cu Polis a yega, nan a nota cu Bongo Bar ya caba ta cera. E unidad di Polis a informa Central di esaki.
Sinembargo Central a informa e agentenan, cu e tin e persona cu a yama keto bay na linea, y a bisa cu nan ta paden ainda.
Aki ta unda cu Fiscal Auxiliar tambe a presenta pafo di e negoshi pa pone su mes na altura. E agentenan para pafo, por a tende voz di hende ta bin parti paden di e porta cu tin na e banda pariba di Bongo Bar. Polisnan a controla e porta, y esaki tabata na lock, y e hekwerk tin un candal poni na dje.
Polisnan a papia duro y ordena e hendenan desconoci cu ta na e parti paden di e porta, pa habri esaki. Diripiente e porta a habri. En total 6 persona a sali for di Bongo Bar.
Polis a bay papia cu e manager di Bongo Bar, y el a bisa cu enberdad tabatin un problema den e establecimento nocturno, pero nan a trata di soluciona e problema nan mes. Despues el a indica cu Polisnan tin permiso pa controla Bongo Bar.
E agentenan a haci esey, y despues a bay controla e cambernan tambe cu Bongo Bar tin. Ora di yega na un di e cambernan, a bin nota cu esaki ta na lock. Pero Polis a tende stem di hende for di paden di e camber. E manager a duna nan e yabi, y Polis a kita lock y habri e porta.
Polis a bin haya 3 persona den e camber. Agentenan a duna nan tur ordo pa sali di e camber y keda para eynan. Polisnan a drenta e ora den e camber pa controla esaki. Ora cu nan a hisa e matras di e cama pa check bao di dje, autoridad a descubri un tas cora chikito poni eybao. Den e tas cora aki, Polis a bin haya un schoudertas blauw-scur/preto. Den e schoudertas a bin haya 5 sakito di plastico transparente conteniendo marihuana, y tambe un pistol color preto.
Esaki tabata suficiente motibo pa Polisnan detene e homber y dos muher cu tabata den e camber, pasobra nan a viola Ley di Arma y tambe Ley di Droga. Vehiculo special a pasa busca nan y hiba nan Warda di Polis.
Autoridad a confisca e schoudertas cu e pistol y marihuana. Fiscal Auxiliar a duna ordo pa nan tres keda deteni pa interogacion. E pistol preto a wordo entrega na Oficialnan Forensico di BFTO, cu lo bay check e patronchi cu e balanan ta keda cune despues di a wordo tira, pa check si e pistol aki a wordo usa den recien crimennan rond di Aruba.
Na final a pone Recherche di San Nicolas na altura, como tambe Central di Polis.
