Accident cruel na Colony a ranca bida di dos dama hoben y un criatura di 2 aña

Chauffeur cu a causa accident tabata bao influencia

ORANJESTAD (AAN): Chauffeur di un Nissan Skyline posiblemente por bay wordo acusa pa e morto di 3 persona riba Diadomingo mainta riba caminda principal di Colony den un accident basta cruel.  Esey ta basa riba e hecho cu ora a laga e chauffeur di e Nissan Skyline color preto cu number A-72972 bay supla riba e aparato di Alco Sensor IV, esaki a sali malo pe.

   Y lo mas pisa, ta cu claramente por a mira con su Nissan Skyline a laga rasto atras, unda bo ta mire cu bayendo cu velocidad halto, diripiente y inespera a hala full na su banda robez, net ora cu un Chevrolet Aveo color cora tabata bin di direccion contrario.

   E caminda ey for di entrada di Colony, ta uno cu semper ta basta hancho.  E tin berm hopi habri tambe, y posiblemente coriendo bao influencia di alcohol of algo otro, a pone bay hala full na banda robez.

   Impacto masha fuerte eynan: Net e momento ey un Chevrolet Aveo sedan tabata bin di direccion contrario.  Den dje tabatin dos dama di fam Wouters, y cuatro mucha sinta patras.  Posiblemente nan a caba di bin for di Baby Beach y ta bek rumbo pa cas.

   E dama chauffeur no a ni haya chens di primi brake drechi, ni desvia, pasobra e Skyline a bin dal cu gran impacto riba nan.  Tur cos ta mustra cu e dos dama sinta dilanti a fayece instantaneamente.  Debi na e ‘momentum’ di e impacto, tur cuatro mucha a wordo propulsa padilanti, y haya golpi fuerte.  Uno di nan ta un criatura di 2 aña di edad, cu ya eybao mes no tabata duna señal mas di bida.

   Tabata pa 10:35 am cu e prome yamada a drenta na Polis, di personanan cu ta raporta e accident grave y pisa cu a caba di socede.  Mesora e prome unidad di Polis di San Nicolas a cuminza mobiliza cu zwaailicht y sirena pa e lugar.

   Un escena horible: E prome unidad di Polis cu a yega, a bin topa cu un escena horible.  Dos auto destrui, y en total 8 persona envolvi eybao.  Mesora Polisnan a pidi pa manda lo mas hopi Ambulans posible, y tambe Vehiculo di Rescate di Cuerpo di Bombero.

   Polis a bay check tur 8 persona, y mesora a nota cu tin 3 persona den e Chevrolet Aveo cu no ta duna señal di bida, y mesora a pidi Central di Polis pa notifica instancianan concerni, pone Ministerio Publico na altura, y yama personal forensico di BFTO.

   Un cantidad di unidad di Polis mas a mobiliza pa e area pa asina yuda seya e lugar pa investigacion, y pa asisti esnan herida.  A bin nota cu 3 mucha den e Chevrolet ta gravemente herida, y un pasahero di edad grandi den e Nissan Skyline tambe ta basta grave.  Polis a papia cu e chauffeur di e Nissan Skyline, y mesora a mira cu e persona aki ta visiblemente bao influencia.  Pero e tambe tabata herida, pero no asina serio.

   Personal di Vehiculo di Rescate mester a corta tur porta di e autonan pa asina yuda saca e victimanan.

   Vocero di Polis, Lito Lacle, a indica cu diferente Ambulans a transporta 3 mucha grave herida di e Chevrolet Aveo.  Nan ta un mucha di 5 aña, uno di 3 aña, y un baby di 10 luna.  E mucha di 2 aña no tabatin signo vital mas, y a keda atras.

   For di e Nissan Skyline, Paramediconan a transporta e pasahero di edad grandi tambe cu ta den situacion grave.  Despues e chauffeur di e Skyline tambe a bay pa chekeo medico, pero esaki a socede bao vigilancia di Polis.

   Via di Centro di Alarma a manda busca un Docter, kende a yega na e lugar pa check e 3 victimanan den e auto.  Pa 11:28 am, Docter De Cuba a constata morto di e dama Joanne Carolina Wouters, naci dia 13 di October 1987 na Aruba (edad di 34 aña), tambe di su ruman muher Mirella Jennyfer Wouters, naci dia 1 November 1986 na Aruba (edad di 35 aña), y di e criatura Rendrick Wouters di apenas 2 aña di edad.

   Polis di trafico como tambe polis tecnico di Cuerpo Policial a presenta na

e lugar di accident pa haci nan investigacion.  Personal di Bureau Slachtofferhulp tambe a presenta eynan pa brinda yudansa y sosten na e famia di e fayecidonan.  Ta tristo cu e 3 muchanan aki a perde nan mama y awor nan ta grave na Hospital.

   Finalmente cu Sjersh di Ad Patres Funeral Home, e restonan mortal a wordo hiba pa Morturarium.

   Tres morto riba un Diadomingo mainta di paz, sigur ta algo cu a shock pueblo.  Esaki hunto cu e informe cu un hoben di 24 aña a hoga den piscina e mainta ey mes, ta pone hopi hende puntra nan mes den ki direccion ta bayendo ultimo lunanan di aña 2022.

   Cu e fayecimento di e 3 personanan aki, e cantidad di persona cu den 2022 a fayece den trafico insigur na Aruba, a yega na e cifra di 9 victima.

   DIARIO como tambe Cuerpo Policial ta manda palabra di condolencia na famianan di e fayecidonan.