ORANJESTAD (AAN): Un otro caso di atraco a keda registra e siman aki.
Tabata Diaranson pa mas o menos 12:25 pm central di polis ta worde notifica cu un atraco a tuma lugar riba Brazil Food Center.
Inmediatamente Central di Polis a pone e unidad di Polis di San Nicolas cuminza mobiliza den e area cu ta keda riba e caminda di Caya Bernadina Growell (Misa di Brasil bay pariba), un poco mas pariba cu Centro di Bario Brazil.
Na yegada di e prome patruya, a bin topa cu e victimanan ainda spanta. Toch nan a coopera y di e forma ey e doñonan di e supermarket a indica cu ta trata di dos hende homber jong cu a caba di tira e atraco. Tur dos tabata tin arma di candela den nan poder.
Un di e sospechosonan tin color di cuero bruin cla, y tabata tin camisa shinishi bisti, y jeans preto. Na su cabez e tabatin un muts preto.
E di dos sospechoso tabatin camisa shinishi tambe pero cu jeans blauw bisti. Na cabez e tin un muts blauw scur. Tur dos ta papia bon papiamento.
Cu e arma den man, nan a menaza gerencia y a obliga e cashier di entrega placa, cu segun nan calculo ta banda di 1.000 Florin.
Despues di esey, nan a rek un careda sali di e negoshi, y a cuminza core bay pariba riba e caminda cu ta sigui pa sea Rooi Master, Palisiaweg, of e areanan di Rooi Congo.
Recherchenan a cuminza core den areanan unda nan sa cu tin anti-socialnan ta biba y cu ta capaz di haci e tipo di cosnan aki.
A pidi presencia di Atraco Team, y como cu lo tin varios vingerprint, a pidi pa oficialnan forensico di BFTO yega na e lugar tambe.
Vocero di Polis Liliana Rasmijn, despues a confirma na DIARIO cu un rato despues na altura di Weg Rooi Congo a logra pone man riba e dos atracadornan.
Polis a pone nan man mesora den boei, y a ser presenta dilanti Fiscal Auxiliar, kende mesora a duna ordo pa nan keda encarcela.
